Imprimir

As residencias de maiores galegas suman xa 110 casos de coronavirus

Europa Press | 26 de marzo de 2020

Un operario con traxe de desinfeccion, na residencia de maiores San Carlos de Celanova (europa Press)
Un operario con traxe de desinfeccion, na residencia de maiores San Carlos de Celanova (europa Press)

Galiza eleva a 110 as persoas afectadas por coronavirus en residencias de maiores, 88 delas usuarias e 21 traballadoras, segundo os datos da Consellaría de Política Social. Nos Centros de Atención a Persoas con Discapacidade ( CAPD) contabilízanse 15 casos de persoas residentes afectadas e dous entre o persoal. 

O "caos organizativo e a deixadez na toma de medidas de prevencion perante a COVID-19" levou esta semana a CIG a denunciar a Consellaría de Política Social perante o Xefe Territorial da Inspección de Traballo pola súa xestión.

Os últimos casos en residencias rexistráronse na Domus Vi Carballo, que conta cun diagnóstico en activo, na de San Lázaro -en Compostela-, onde aumentaron até  15, en Domus Vi Barreiro (Vigo), onde chegan aos 33, na residencia Nosa Señora de Fátima, no Barco de Valdeorras, onde hai rexistrados tres casos, e na Esperanza, de Ourense, con outros tres.

Os datos tamén contemplan diagnósticos na residencia de Celanova (13), O Portádego (9) e Fogar Bellolar,  (3), ambas as dúas na Coruña; en Caldas (2), Cangas (4), Castro Caldeiras (1) e na residencia Betania, en Viveiro (1).

Desde Política Social informan de que un dos pacientes diagnosticados en Celanova e outro en Fogar de Bellolar faleceron, e indica que un equipo sanitario se desprazou na xornada de onte ao centro do Portádego para prestar atención médica. 

En canto ao persoal afectado, as cifras ascenden a 21 persoas infectadas, das que 14 pertencen ao centro de San Carlos de Celanova, 5 á Domus Vi Barreiro de Vigo, unha forma parte do persoal da residencia A Esperanza  de Ourense e unha, ao do centro San Simón, en Teo.  

Os centros de atención especializada para persoas con diversidade contabilizan entre os e as usuarias 15 casos, 8  deles en Aspronga (Oleiros), 4 en Redondela, 2 en Aixiña (Ourense) e 1 en Santa Cruz, San Rosendo (Ourense). Segundo certifican desde Política Social, tamén hai en Aspronga e Redondela dúas persoas do equipo profesional afectadas.

 

Podes ver este artigo na próxima dirección /articulo/social/residencias-maiores-galegas-suman-xa-110-casos-coronavirus/20200326104133093878.html


© 2020 Nós Diario