PALABRAS CON MEMORIA

Quen facer tenta, necesita ferramenta

ferramentas

Azoso/a.- Cómodo/a, referido a calquera útil ou instrumento que serve axeitadamente para o seu cometido. 

Exemplo: “Este raño non me é azoso; dáme esoutro do mango máis longo”. Tamén pode referirse a unha prenda ou similar: “Á voda levarei os zapatos negros, que me son máis azosos”. Por extensión úsase incluso para as persoas que son xeitosas para algún labor en concreto. Exemplo: “”Ai, foi Carmiña! É unha rapaza tan azosa!”
Lugar de escoita.- Lamas (San Sadurniño).
Fonte.- María X. Anca Casal.

Bombo.- (Ademais de significados xa rexistrados) Utensilio xiratorio para asar castañas.
Lugar de escoita.- O Courel.
Fonte.- Dun vocabulario courelao.

Corgo.- (Ademais de significados xa rexistrados) Aparello para o baleirado de pozos polo sistema de sifón.
Lugar de escoita.- O Courel.
Fonte.- Dun vocabulario courelao.

Esparar.- (Ademais de significados xa rexistrados) Armar o aparello do palangre.
Lugar de escoita.- Muxía.
Fonte.- Proxecto Buserana de Muxía.

Folgazán.- (Ademais de significados obvios) Fregona, utensilio semellante á vasoira empregado para fregar o chan. 
Exemplo: “Colle o folgazán e seca esta auga que me caeu no chan”.
Lugar de escoita.- Burela.
Fonte.- Mario Ferreira López.

Tarabela.- ( Á parte doutros ben coñecidos significados) Aeroxerador. 

Lugar de escoita.- Moa- Vilatuxe, Serra do Candán (suroeste do concello de Lalín).
Fonte.- Daniel Blanco Moa.
Outros apuntamentos.- Exemplo de adaptación do vocabulario ás novas tecnoloxías. Por analoxía co aparello tradicional.  

Trebella.- Ferramenta usada na agricultura. 
Exemplo: “Vai coller a trebella, que imos á leira”.
Lugar de escoita.- Cerceda.
Fonte.- Xián Suárez Tincado./CPI O Cruce de Cerceda.

Palabras con Memoria é unha sección que coordena a Asociación de Escritoras e Escritores en Lingua Galega. Todo o material podes consultalo aquí.

Se queres achegar algunha palabra que non apareza nos dicionarios, dirixe as túas propostas ao correo palabra.con.memoria@aelg.org (indicando a palabra, a súa acepción e o lugar en que foi recollida) ou cobre este formulario.

Comentarios