Un grupo de investigadores da Universidade de Santiago de Compostela vén de presentar unha metodoloxía que permite vixiar e detectar o virus SARS-Cov-2 en augas residuais.
Este proxecto, liderado polo profesor e investigador Juan Lema, baséase no estudo da presenza de material xenético deste coronavirus nos lodos das plantas depuradoras, "onde se concentra a carga viral".
"A toma de mostras na auga, aínda que sexa composta ao longo do día, pode non reflectir a carga vírica promedia real. Pola contra, os lodos manteñen un tempo de residencia elevado no sistema, polo que permiten integrar a carga viral diaria, é dicir, fai posíbel medir o que ocorre ao longo de todo o día", explicou Lema.
Para desenvolver o proxecto, que hoxe xa se está a aplicar en Abu Dabi, os investigadores fixeron un seguimento nas estacións depuradoras de Ourense e Compostela: "Fomos detectando que, canto maiores eran as cifras de contaxiados, maior era a presenza do ARN do virus nas augas residuais", indicou o profesor.
Micromecenado
O financiamento deste proxecto correu a conta dun programa de micromecenado da USC, "Sumo Valor", que permite a empresas e particulares facer doazóns inferiores a 3.000 euros.
Porén, Lema, catedrático de Enxeñaría Química, fixo un chamamento público advertindo da importancia de investir en ciencia: "É preciso que a poboación se conciencie de que a investigación é un elemento esencial para o desenvolvemento da sociedade.
O micromecenado é precisamente unha resposta da sociedade a esta concienciación, xa que os cidadáns valoran de xeito individual a relevancia de comprometer recursos económicos", afirmou.
