Persoal e patronal acadaron na noite desta segunda feira un preacordo coa mediación do Consello Galego de Relacións laborais que pode poñer fin ao conflito no sector das ambulancias da Galiza. O contido deste preacordo será debatido esta cuarta feira en asembleas e serán os traballadores e traballadoras quen deican finalmente se o aceptan ou non. De darlle o visto bo, suspenderíase a greve indefinida prevista para arrancar esta quinta feira, día 21. De rexeitalo, a folga comezaría nos termos previstos.
Segundo informa o comité de greve, o preacordo recolle unha parte económica que contempla un incremento salarial de 12%:o convenio que se logre durará até 2022, a suba salarial será de 4% a partir de 2019 e incremento salarial de 3% a partir do 1 de novembro de 2020 máis unha paga única de regularización de 500 euros nese mesmo mes. A partir de 2021 a suba será de 2,5% e crearase unha nova paga extra. O aumento salarial será de 3% a partir de xaneiro de 2022.
Outras cuestións que se contemplan no preacordo son que nas vacacións incluirase a media de todas as percepcións do ano anterior, desde 2019 e con efecto retroactivo. As subas calcularanse a partir do salario do condutor e aplicarase a mesma suba en todas as categorías.
