As enquisas publicadas por diferentes medios mostran un escenario político en Galiza moi diferente ao que debuxaron os comicios de 2011. Todas coinciden en que o Partido Popular será a forza máis votada no país durante os próximos comicios do 20D. Pola segunda praza competirían PSOE e En Marea. Ciudadanos conseguiría representación mentres que Nós quedaría no limiar de alcanzar un escano, segundo os tres estudos de opinión.
Segundo o inquérito realizado por Sondaxe para 'La Voz de Galicia', que o PP lograría 11 escanos, seguido de En Marea con 6. O PSOE baixaría até os 4 deputados, mentres que Ciudadanos se faría con dous escanos. Apunta o estudo un alto número de persoas indecisas, máis de medio millón, que representan a un cuarto dos e das censadas con dereito a voto.
O diario 'La Región' sinala un resultado próximo pero diferente na enquisa realizada por Infortécnica. O PP sería de novo o gañador, con entre 11 e 12 escanos. En Marea estaría entre os 4 e os 6 escanos, co PSOE empatado con entre 4 e 5 escanos. Ciudadanos tamén conseguiría 2 deputados segundo este inquérito.
Por outro lado, a enquisa realizada por GAD3 para o xornal 'ABC' agoira que o PP obtería entre 11 e 12 escanos. O PSOE manteríase como segunda forza con entre 5 e 6, mentres En Marea estaría entre os 3 e 5 representantes; por 2 de Ciudadanos.