Portugal avanza que Europa terá que depender menos da China após o coronavirus

O primeiro ministro portugués, António Costa, apunta a que o país luso terá que buscar fórmulas para diminuír a súa dependencia de produtos fabricados na China a partir da crise provocada pola pandemia da COVID-19. 

Para Costa, esta é unha oportunidade para que Europa volva producir aquilo que, co tempo, xa só se produce na China, para tratar de romper a súa dependencia co país asiático.

O titular do Goberno de Portugal considerou estes días que esta é unha lección que os europeos deben sacar desta crise, pois defende que tanto no seu país como no resto de Europa hai capacidade para producir. Como xa o demostra o feito de que varias empresas portuguesas mudasen a súa actividade principal nestes días para fabricar equipos de protección individual (EPI) para o coronavirus.

Neste sentido, António Costa ve que Portugal debe incrementar as súas exportacións como vía para facer crecer a súa economía a longo prazo.