Os nove festivais de cine máis importantes de Pontevedra e a Deputación provincial presentaron onte en sociedade a marca 'Rías Baixas Film Fest', unha firma colectiva coa que aportar maior calidade ás citas audiovisuais. Todas as organizacións promotoras aclaran que esta unión servirá para "relanzar e fortalecer" cada evento.
“Hai poucas provincias no conxunto do Estado que teñan tantos festivais audiovisuais e de tanta calidade como a de Pontevedra”, destacou a presidenta provincial, Carmela Silva. Partindo desa premisa, a sede da Deputación en Vigo acolleu a representantes dos festivais de Cans (O Porriño); Primavera de Cine (Vigo); FIC Bueu (Bueu); Play-Doc (Tui); Festival de Cine Inclusivo de Vigo (Vigo); Curtas Festival do Imaxinario (Vilagarcía); Galicia Freaky Films (Vigo); Novos Cinemas (Pontevedra) e Curtas Armadiñas (Poio).
De feito, foron estes mesmos os que lle propuxeron á entidade provincial crear unha marca conxunta que representara a todas e todos. "Hoxe comeza a andaina dun proxecto, moi potente, que fostes capaces de construír entre todas e todos vós", subliñou Silva. O único importante non é a unidade senón o feito de que coa cooperación baixo o título 'Rías Baixas Film Fest' vaise poder publicitar todo ao tempo e impulsar as iniciativas "como un sector estratéxico" para Pontevedra.
“Son festivais con compromiso, que están ao lado da sostibilidade, da igualdade, da cultura galega e do respecto á nosa lingua”, engadiu.
Maior forza
As organizacións das distintas propostas audiovisuais do sur da Galiza coincidiron en que a marca de referencia podería servir para abrir fronteiras e chegar a máis sitios e a máis xente, malia que este ano as edicións vaian ser diferentes.
En nome de todas e todos os representantes dos festivais falou o director do Play Doc de Tui, Ángel Sánchez, que destacou que houbo un "diálogo fluído" en todo momento para traballar a prol do obxectivo común. Na súa opinión "unir esforzos" fai as citas "máis fortes". Sánchez reiterou o peso que ten entregarse como colectivo "para incrementar a visibilidade, dignificar a cultura, profesionalizar o sector e ser máis fortes no relato cultural".
