![[Imaxe: Cedida] Saída de autocares desde As Pontes.](/asset/thumbnail,1280,720,center,center/media/nosdiario/images/2019/10/16/2019101613044213159.jpg)
![[Imaxe: Lia Paz-EP ] Central de Endesa nas Pontes](/asset/zoomcrop,320,180,center,center/media/nosdiario/images/2019/10/14/2019101419375434782.jpg)
As Pontes vive esta cuarta feira 16 de outubro unha xornada de folga xeral secundada de forma masiva por toda a poboación e os sectores sociais económicos e sociais do municipio. Rúas baleiras, comercios fechados é a imaxe coa que amenceu esta vila do Eume.
A única actividade da xornada tivo lugar pola mañá cando doce autocares partiron da vila, aos que se sumaron outros oito desde outros municipios da contorna, para trasladar ás veciñas e veciños até Madrid onde terá lugar unha manifestación a partir das 16 horas diante do Congreso.
“O 100% comercio e a hostalería secundou esta folga”, explica a Sermos Galiza a concelleira de Turismo, Consumo, Hostalaría e Comercio das Pontes, Elena López, “a maior parte da xente marchou cara Madrid, ademais de empregar os autocares tamén foron en tren e coches particulares”. A edil calcula que ao redor de 2.000 persoas participarán na protesta en Madrid.
A folga conta co apoio total de sindicatos, colectivos sociais e de asociacións empresariais como a Confederación de Empresarios de Ferrolterra, Eume e Ortegal (Cofer), a Asociación de Empresarios de Ferrolterra (AEF), a Asociación de Comerciantes, Hostaleiros e Empresarios Ponteses (Cohempo) e a Asociación de Empresarias e Empresarios das Pontes (Seara).
Sen actividade nos centros de educación
O seguimento da folga tamén foi total no sistema educativo do municipio. Entre todos os centros suman 1.200 estudantes e esta cuarta feira acudiron en total cinco crianzas de infantil e unha de secundaria. Sermos Galiza púxose en contacto cos Colexios A Fraga, Santa María e A Magdalena e cos IES Castro da Uz e Moncho Valcárcel nos que están a funcionar con normalidade os servizos mínimos decretados mais sen asistencia do alumnado.
“Está todo pechado”, explica a Sermos Galiza José Antonio López, director do IES Castro da Uz, “é uha situación moi complicada para o municipio e as únicas persoas que acudiron ao traballo aquí son xente de fóra que está a favor da folga mais non está tan implicada”. Nese centro non asistiu o alumnado e no profesorado secundou a folga o 33%.
Máis de 130 camións partiron esta terza feira con destino Madrid para participar na mobilización en demanda dunha solución para As Pontes. Mobilización apoidada por diferentes entidades e colectivos.
