O Consello de Coordinación Estatal de Podemos determinou, na súa primeira análise da "derrota sen paliativos" que sufriron nas eleccións galegas --onde se pasou dunha representación de En Marea de 14 deputados e deputadas a ningún-- e vascas do pasado domingo, que os malos resultados débense "á febleza organizativa nos territorios debido ás pelexas internas da etapa anterior", segundo informan fontes do partido morado.
En canto ás solucións, a Executiva considera que os cambios no modelo organizativo que xa se aprobaron na Terceira Asemblea Cidadá Estatal de maio --na que Iglesias foi reelixido con ampla maioría son a clave para afrontar este problema. Así mesmo, defenden que aínda "están a tempo" de recuperarse.
O vicepresidente segundo do Goberno e líder de Podemos, Pablo Iglesias, decidiu pospoñer até esta sexta feira a habitual reunión das segundas feiras da súa Executiva, co obxectivo de non realizar análise en quente da caída electoral, e esperar a ter unha primeira valoración dos territorios afectados.
Finalmente, os máximos dirixentes de Podemos reuníronse esta sexta, cinco días despois dos comicios, e canda os candidatos do partido na Galiza e País Vasco, Antón Gómez-Reino e Miren Gorrotxategi, determinaron que as leas internas que se produciron neses territorios nos últimos anos son a causa da súa desfeita electoral, xa que lles impediron construír unha organización forte.
Ante esta problemática, as fontes consultadas sinalan "a necesidade de poñer en marcha canto antes o aprobado na Asemblea Cidadá para poñer o partido en dirección ao próximo ciclo electoral". Estamos a tempo de recuperarnos sobre os resultados actuais", engaden.