A poboación galega rexeita maioritariamente a monarquía

As galegas non somos monárquicas. Mentres Felipe VI segue a contar co respaldo maioritario da cidadanía do Estado, o groso da poboación das nacións sen Estado  declárase republicano. Unha recente enquisa volve certificar esta tendencia de carácter estrutural que non para de medrar desde 2009.

David Minoves co cartel contra o rei Felipe VI o sábado en Barcelona
photo_camera En primeiro termo, Felipe VI, en Barcelona.

Un estudo elaborado entre o 28 de maio e o 3 de xuño pola empresa demoscópica IMOP para o xornal dixital El Confidencial cunha mostra de 1.031 entrevistas no conxunto do Estado español vén certificar que a opción republicana é maioritaria no noso país, cun 51,6%, deixando nun 45,6% a porcentaxe de galegos que se declaran monárquicos.

O 51,6% da poboación galega declárase republicana

As conclusións deste estudo sociolóxico veñen certificar as tendencias xa manifestadas noutros traballos anteriores, como o publicado por CTXT hai practicamente un ano, ou os dados filtrados das enquisas elaboradas polos grandes grupos económicos.

Neste sentido debemos explicar a negativa do CIS a preguntar sobre esta cuestión nas súas sondaxes periódicas, até o punto de retirar en 2015 do seu barómetro a valoración sobre a monarquía. Á vista dos dados semella que a substitución de Juan Carlos de Borbón polo seu fillo Felipe non deu os resultados desexados, aumentado nos anos do reinado a contestación á institución.

As nación sen estado lideran o rexeitamento á monarquía

Catalunya, Euskadi e Galiza encabezan a alternativa republicana, significándose dentro destas as dúas primeiras nacións. Así, na Catalunya administrativa o 74,0% da poboación aposta na república e só un 21,6% na monarquía. Acontece outro tanto en Euskadi, onde un 70,6% dos entrevistados decláranse republicanos e un 24,7 monárquicos.

A outra cara da moeda atopámola en Andalucía, o territorio que máis solidamente apoia Felipe VI cun 75,1% que se confesa monárquico e un 23,5% de republicano, e en Madrid, onde o 62,0% da poboación expresa o seu apoio á coroa e un 37,4% á república.

Os dados de conxunto recollidos neste estudo de IMOP para as dúas castelas, Asturias, Cantabria, A Rioxa, Canarias, Estremadura e Murcia ofrecen uns dados semellantes, cun 56% da poboación favorábel a monarquía e un 39% en contra. A foto final desta sondaxe deixa poucas dúbidas sobre a centralidade do vector nacional á hora de explicar a contestación á monarquía.

O electorado nacionalista é o máis republicano

O rexeitamento á monarquía é proporcional ao nivel da conciencia nacional e ao peso social das alternativas nacionalistas. A información achegada pola enquisa de IMOP sinala que a base electoral do tripartito de dereitas é a grande defensora da coroa, declarándose como monárquico o 90,7% dos votantes do Partido Popular, o 82,7% dos de Vox e o 82,2% dos de Ciudadanos, sumando no caso dos primeiros ás maiores porcentaxes de apoio á república precisamente na Galiza.

Pola súa contra o electorado das formacións nacionalistas é o máis proclive á alternativa republicana, sinalando hai para un ano unha enquisa de Electomania para CTXT que o 96% dos votantes de PNV e  PDCAT e o 95% de ERC, Bildu e BNG votarían contra a monarquía nun referendo.

Os votantes do PSOE presentan a maior división ao respecto, cun 51,6% que se declaran republicanos, significándose nesta porcentaxe a posición dos votantes socialistas nas tres nacións sen Estado e Valencia.

Galiza non ten rei

A situación que vive a coroa non pasa desapercibida para os partidos sistémicos até o punto de que as mostras e declaracións de apoio son cada día máis claras. As primeiras palabras de Pablo Casado como presidente do PP proclamando a lealdade do seu partido á casa real, a imaxe dos dirixentes de Vox colocando cadros do monarca nos seus despachos ou a utilización de garabatas de cor verde, símbolo apoio a monarquía, por un número importante de dirixentes políticos son un exemplo evidente dos problemas da institución.

A día de hoxe Felipe VI xa non é rei dunha parte significativa dos cidadáns do Estado, carecendo de marxe para ensanchar a súa base e cunha posición cada día máis decantada cara opcións reaccionarias. Porén segue contando co apoio dos grandes poderes económicos e do aparello do Estado que ve nel o garante da súa unidade.

Comentarios