Maio supuxo un descenso no paro rexistrado de 547 persoas na Galiza, un descenso de 0,3% , dato mellor que o rexistrado a nivel de Estado español, e onde o desemprego aumentou en 0,7%. A recuperación paulatina da actividade que se permitía co desconfinamento após o confinamento estrito de marzo e abril deixa esta feble pegada na baixada do paro.
Porén, unha comparativa co mesmo mes, maio, do ano pasado indica que a situación non está para botar foguetes: hai agora 30.277 persoas máis rexistradas no paro que daquela.
Os contratos rexistrados o mes pasado foron 30.873, moito menos que nun mes normal. Porén, o que si se mantén é a alta temporalidade: máis de 27.000 deles son indefinidos.
No que atinxe á Seguridade Social, as afiliacións aumentaron en 1.600. Como pasa co paro, é cando comparamos co mesmo mes do ano pasado cando vemos a magnitude do impacto da crise do coronavirus: hai agora 42.000 persoas afiliadas menos.
A CIG incide en que máis do 30% da poboación activa galega está no desemprego. "En total, son 401.207 as persoas que se atopan no paro ou afectadas por un ERTE, o que significa que un de cada tres galegos e galegas en idade de traballar non o está a facer".
Desde a UXT consideran que os datos de paro urxen "estender a protección ás persoas traballadoras e un plan de reconstrución para superar a crise da COVID19 sobre o emprego".
Para CCOO, os datos son "conxunturalmente positivos", e responden tanto á especialización produtiva galega, cunha menor dependencia do sector turístico, como ao regreso á actividade pola desescalada. Con todo, mentres a actividade non se recupere por completo, "non poderemos ter unha avaliación axustada do impacto no mercado laboral galego da crise provocada polo coronavirus", advirte o sindicato.