capón.- (Ademais de significados xa rexistrados) Cachelo.
Lugar de escoita.- San Lázaro (Mondoñedo).
Fonte.- María Celina Cruz Rodríguez.
ceboleada.- Doce, larpeirada.
Lugar de escoita.- Burela.
Fonte.- Mario Ferreira López.
espenar (as patacas).- (Ademais de significados xa rexistrados) Quitarlle a monda ás patacas.
Lugar de escoita.- Camelle.
Fonte.- Sofía.
Outros apuntamentos.- Centro de Día de Rois.
garabilleira.- Pata das galiñas que se come no cocido.
Lugar de escoita.- No sur da provincia de Pontevedra (na fronteira con Portugal).
Fonte.- José Luis Pérez Morais.
Outros apuntamentos.- A fonte considera que vén de garabillar, escarvar a terra coas uñas como fan estes animais. Noutras zonas do país, sería escaravellar, esgarabullar, esgarabellar.
millerado.- Dise do mel cando cristaliza.
Lugar de escoita.- Arante (Ribadeo).
Fonte.- Andrés Lombardía Crespo.
Outros apuntamentos.- Non sabemos de momento se o verbo millerar é de uso en tempos que non sexa o participio.
nácoras.- Utilízase para referirse ás patacas.
Exemplo.- "Estas nácoras estanche ben boas.”
Lugar de escoita.- Bisbarra de Bergantiños.
Fonte.- Alberte Suras.
Outros apuntamentos.- Indica o informante que é moi posíbel que derive da xiria dos canteiros.
pénghamo ou pénxamo.- Biscoito típico da Mariña luguesa, menos esponxoso porque non se montan as claras dos ovos.
Lugar de escoita.- Burela (A Mariña luguesa).
Fonte.- Mario Ferreira.
Outros apuntamentos.- O nome provén do barrio de Viveiro que así se denomina.
