Se de algo se pode gabar o Outono Códax na súa curta mais exitosa historia, é ter traído a Compostela as grandes lendas da música negra con históricos concertos que converteron a capital galega no centro do jazz, do soul ou do rhythm & blues. Nesta quinta edición, que se desenvolverá ao longo de tres sábados consecutivos de outono, o 19 e 26 de setembro e 3 de outubro, non ía ser menos, coa vontade de conmemoración do festival que mostra a súa organización. A presenza da gran Naomi Shelton na súa primeira actuación no Estado é reclamo abondo para converter, máis unha vez, en referencia esta cita musical que cada ano colga o cartel de non hai entradas na Sala Capitol de Santiago. Desta volta, e por vez primeira, o festival expórtase máis alá de territorio galego e inclúe no seu programa un concerto o día 2 de outubro na Sala Acapulco de Xixón.
Con Naomi Shelton estarán o 3 de outubro Mike Sánchez e Tommy Hunt, vocalista de The Flamingos. A que está considerada como unha das divas da música negra e a última estrela de Daptone Records, estará acompañada no concerto en Compostela do seu coro The Gospel Queens e da súa potente banda na que, entre outros, conta co baixo de Fred Thomas, acompañante de James Brown. A estrela americana David Hooper brillará tamén no Outono Festival nunha das citas imprescindíbeis canda o show The Gospel Sessión con Onno Smit, Paul Willemsen e a voz de Michelle David.
Os catalás The Velvet Candles e o soul español de The Velvet Candles integrarán un programa que, como cada ano, inclúe unha oferta da música feita en Galiza, desta volta con Transilvanians, The Soul Jacket e Sabela King&The Heartbreakers.
A nova edición do Outono Codax ofrece, desta maneira, un abano de sons que vai do soul clásico ao máis emerxente neo-soul, transita polo rhythm&blues e convida a gozar co funk, o gospel máis espiritual ou a enerxía do rock´n roll pasando polo reggae ou o doo-woop.
O festival, organizado por Raíña Productions e A Reixa, conta co patrocinio de Martín Códax, e a colaboración de Pousadas de Compostela, ademais de case un cento de establecementos hostaleiros e comerciais do concello.
