Militantes e activistas sociais desprazadas de diferentes comarcas da Galiza reuníronse esta fin de semana en Compostela para debater e poñer en común a evolución das xuntanzas e asembleas para conformar o xérmolo dunha nova organización independentista. A denominación provisional desta, que nacerá das cinzas de Causa Galiza, será Coordenadora Constituinte do Proxecto Independentista. Na reunión de Compostela valorouse, segundo participantes, "a receptividade positiva que a proposta está a ter por parte de decenas de nacionalistas, mais tamén as reticencias, desconfianzas e suxestións". Neste senso, a recén nada Coordinadora nacional vén de "fixar un guión xenérico e reformábel sobre os contidos a resolver no proceso constituinte".
Aliás, decidiron adiar a constitución formal e proxección pública da Coordinadora debido que aínda está en marcha a constitución de asembleas locais e comarcais. No entanto, nas próximas semanas seguirase cos contactos e diálogos abertos coa base social independentista "para ilusionala e incorporala ao proceso. Esta será, por tanto, a nosa tarefa prioritaria nas próximas semanas con vocación de facer un proceso inclusivo, participativo e aberto á militancia da esquerda independentista".
Guión-marco do debate
Alén disto, a Coordenadora decidiu propor ás asembleas de base que se están a formalizar no país un guión sobre cuestións que, desde a óptica deste órgano, sería necesario que se definisen e resolvesen no proceso constituínte. Así, por exemplo, este guión abriría o diálogo e o debate sobre o diagnóstico da situación internacional, estatal e nacional; a liña política, principios, táctica e estratexia e o modelo organizativo do proxecto asemblear, entre outras cuestións propostas ás asembleias comarcais, que poderán alterar este rascuño.
