A requisa a seareir@s do Deportivo de bandeiras nacionalistas no estadio do Valladolid, último capítulo dun ronsel de accións represivas dirixidas contra os adept@s de equipas galegas en certos campos do Estado, chega ao Congreso. E faino a través dunha pregunta que presenta o BNG e na que inquire ao goberno español por estas actuacións.
@s nacionalistas interésanse por coñecer os motivos de por que as forzas de seguridade se incautan de bandeiras democráticas e mesmo cheguen a ameazaren a afeccionados que levan estas enseñas. Diríxese o BNG directamente ao Ministerio do Interior para preguntarlle en que se basea para inclusive prohibir o acceso a unha persoa ao estadio se este levar unha estreleira.
Nesta liña, o goberno español terá que respostar se considera ou entende que a bandeira nacional galega é “unha cuestión de seguridade” ou “altera a orde pública” nun estadio deportivo, mentres que neses parámetros nunca se poñen ás bandeiras españolas, mesmo aquelas que simbolizan a ditadura franquista.
Seareir@s no punto de mira
En Valladolid mesmo se levantou unha acta a un seareiro deportivista na que puña: ““El funcionario actuante requiere al denunciado para que deposite en el control de entrada una bandera independentista que lleva atada a la cintura. Al negarse, el funcionario actuante procede a hacer que abandone el estadio”.
A teor disto, o BNG quere saber por que as forzas e corpos de seguridade do estado tratan @s adept@s galeg@s que acoden aos estadios con bandeiras nacionalistas “como un problema de seguridade ou de alteración da orde pública”.
