Opinión

O ataque dos clons

Na saga de Star Wars os rebeldes crean un exército de clons para enfrontarse aos droides imperiais. Seres biolóxicos, idénticos entre si, derivados dun único individuo. Para min, os antivacinas e os defensores das pseudociencias en xeral son un pouco como os clons. Poden ser individuos únicos, pero para o caso son idénticos entre si, polo menos nos argumentos que manexan. Cando todos pensabamos que coa que estaba caendo os detractores das vacinas deberían estar caladiños e agachados baixo unha pedra, resulta que asistimos a un rexurdimento clónico das súas posicións, alentadas polas ideas máis disparatadas da extrema dereita americana. Nos xornais máis amarelistas e nos faladoiros de certas televisións pódese escoitar os argumentos conspiranoicos ao respecto, moitas veces incompatibles entre si. O máis repetido é que o coronavirus non existe e é unha ferramenta de control social, polo tanto a vacina non sería necesaria. Tamén se pode pensar que o virus é real, creado e modificado nun laboratorio secreto estadounidense ou chinés (tanto ten) coa finalidade de vender millóns de unidades da vacina, que foi desenvolvida simultaneamente e comercializarase cando a situación sexa tan extrema que os gobernos estean dispostos a pagar o que sexa necesario. Hai quen di que o virus é unha vinganza da natureza pola nosa intervención e non se debe combater con máis intervencións, senón cunha vida máis natural e libre de químicos.

Cando penso que o que acontece é suficientemente grave como para facer que aprendamos algo sempre me dou de fociños coa evidencia: hai moita xente que só está agardando para volver á carga coas mesmas ideas irracionais, pero adaptadas á nova situación. Supoño que o realmente grave non é que haxa quen sosteña este tipo de discursos, á fin e ao cabo moi minoritarios, como queda claro pola resposta responsable e madura da inmensa maioría da poboación. O grave é que certos medios dean voz a estas ideas e as presenten en pé de igualdade con outras racionais e ben argumentadas, dando unha impresión de falso debate e de “polémica”. Por último, tamén haberá quen non crea realmente nas teses conspiranoicas pero as empregue para aumentar o ruído e a incerteza coa intención de favorecer os seus propios intereses.

Comentarios