“O goberno desexa non ter industria”. Así de directo é José Antonio Zan, presidente do comité de empresa de Alcoa en San Cibrao, após dixerir o texto da poxa de interrupción que publicou esta terza feira 3 de decembro no Boletín Oficial do Estado (BOE). O responsábel sindical explica a Sermos Galiza que as bases publicadas non teñen moito sentido en ningún dos seus apartados. “Pon a competir cementeiras con empresas que necesitan a enerxía para poder subsistir”, explica o presidente do comité de empresa, “no noso caso un 40% dos custes de produción da nosa empresa é de enerxía e na poxa compáranos con outras que teñen dependencia enerxética nun 0,5%, é ridículo”.
Segundo explica Zan a situación empeorou. “O prezo da nosa enerxía estaba 20 euros máis cara que o de Francia e Alemaña”, sinala, “esa diferencia por megavatio (Mw) a final de ano supuña que a nosa fábrica comezaba con 70 millóns de perdas”. Con esta nova poxa non baixan o prezo para poder competir co resto de Europa, todo o contrario. “Agora serán 10 euros máis polo que estaremos a 30 euros/ Mw e a 105 millóns de euros en perdas”, explica Zan. Para o presidente do comité de empresa “é unha auténtica salvaxada por parte dun goberno que ten un Ministerio de Industria e outro de Transición Ecolóxica que se están a cargar a industria do país”.
As poxas no seu momento fixéronse con bloques de 90 Mw para que tiveran unha parte fixa as grandes empresas electrointensivas. A poxa basease en que unha grande empresa electrointensiva como Alcoa que consumía 400 Mw “nun momento dado de colapso da rede estatal paraba o consumo de enerxía e volcaba 400 Mw á rede”, explica José Antonio Zan, “esa cantidade sería algo así como o que produciría a central nuclear de Garoña”.
O futuro de Alcoa
“Unha vez que a estas empresas non lles permites competir perderían diñeiro indo á poxa posto que parar as cubas electrolíticas leva consigo un desaxuste do proceso que tarda un mes en recuperar”, sinala a Sermos Galiza o presidente do comité de Alcoa, “polo que non ten sentido pagar o mesmo que gastas”. Esta mesma explicación deu a propia multinacional cando coñeceu as bases da poxa. Queda aberta a posibilidade, daquela, de que a empresa decida non presentarse.
O enfado do persoal de Alcoa en San Cibrao co Goberno español é evidente
“Non sei que vai facer a empresa, nós o único escenario no que traballamos é aquel que solucione os problemas da planta en San Cibrao”, asegura José Antonio Zan, “non é lóxico que a grande industria marche para Franza se ao Goberno lle dá a gana”.
O enfado do persoal de Alcoa en San Cibrao co Goberno español é evidente. “Non se lle ve vontade ningunha ao PSOE, polo menos ao que está en Madrid”. Desde o comité de empresas anuncian mobilizacións e unha grande manifestación en Lugo “antes de fin de ano” se o Goberno non actúa antes.
O comité de Ferroatlántica carga contra a poxa
O comité de empresa de Ferroatlántica critica ao Goberno español polo recorte da poxa de interrumpibilidade para o primeiro semestre de 2020. Adiantan mobilizacións en defensa dos postos de traballo e en favor dunha tarifa eléctrica competitiva.
Nun comunicado, reproba que supón un 60% menos con respecto á última poxa, e amosan a súa preocupación "en especial" pola desaparición dos bloques de 40 Mw "que afectan aos grandes consumidores" como é o caso de Ferroatlántica.
CIG chama a mobilizarse diante dun Goberno español 'enrocado na mentira'
“O Goberno español segue enrocado na mentira permanente”, sinala o secretario xeral de CIG Paulo Carril. Para a central sindical nacionalista a actitude do Goberno español é de “inoperancia” e a poxa feita pública “agravará a crise na que está sumida a industria electrointensivas a causa dos elevados custes do prezo da enerxía ”. Sinalan que con estas condicións poderíase dar incluso a circunstancia de que Alcoa non concorra no proceso, favorecendo así ter unha escusa para aplicar máis axustes laborais e produtivos no complexo de San Cibrao.
CIG ten denunciado en numerosas ocasións que o actual sistema de poxa constitúe "unha auténtica ruleta rusa e a verdadeira causa da inestabilidade e do risco permanente dos postos de traballo neste sector”. Por este motivo e nestas circunstancias fai un chamamento a mobilizarse e volvera concentrarse a vindeira terza feira, 10 de decembro, ás 11 horas na Delegación do Goberno na Coruña.
