A perda dos catro buques gaseiros para Repsol e Gas Natural aos que optaba Navantia (e que serán construídos por estaleiros asiáticos) é a pinga que reborda o vaso, xa de por si cheo, da paciencia do naval. Máis de dous mil operarios de Navantia e auxiliares saíron á rúa esta terza feira. Ás demandas xa tradicionais das protestas destes meses, como a de carga de traballo ou maior implicación das autoridades co sector, uniuse a carraxe polas “mentiras” e a “incompetencia”. Os traballadores cortaron o tráfico na AP9 dirección Ferrol con barricadas de neumáticos incendiados.
Nos últimos dous anos destruíronse por volta de 2.500 empregos no naval de Ferrol. “Inasumíbel para o sector, para a cidade e para o país”.
“Este goberno, ímolo tumbar”, foi unha das palabras de orde da mobilización, así como "sen gaseiros e sen dique a comarca vai a pique". Unha manifestación presidida por grandes 'monigotes' que representaban o presidente da Sepi, da Xunta, de Navantia e o alcalde de Ferrol. Todos eles cunha lenda: “culpabeis”.
“Mentiras, mentiras, mentiras”
Ignacio Naveiras, do comité de empresa de Navantia, manifestou de xeito taxativo: “Non hai máis tempo, non hai escusas. Imos dar a resposta que merecen estes senvergoñas políticos que só representan o PP”. Os traballadores reclaman que se cumpran as promesas feitas ao naval: dique flotante e floteis. “Mentiras, mentiras, mentiras”, lamentan os operarios.
Tan pronto finalice a construción en Navantia do buque para armada australiana (que estará listo en decembro), as gradas ficarán baleiras. “Non hai contratos previstos”, afirman. E iso ten unha consecuencia: efectos nada positivos para os 2.400 traballadores do cadro de persoal principal e para os perto de 1.000 das auxiliares.
