O narcotráfico tamén sofre polo coronavirus

Tanto a produción como a distribución víronse afectadas polas restricións na mobilidade, segundo a Oficina da ONU contra a Droga e o Crime.
The Haitian National Police (HNP) with the support of Police serving with the United Nations Stabilization Mission in Haiti (MINUSTAH) analyse drugs at the DCPJ on August 2, 2012. The HNP with the assistance of MINUSTAH and the US Embassy, destroyed 2.27 tons of illegal drugs; 1.606 kg of marijuana and 453 kg of cocaine in Ganthier near Port au Prince on August 3, 2012. After being analysed and inventoried, the drugs were transfered from the DCPJ  in an armed convoy to Ganthier in where they were set alight and destroyed.
Photo Victoria Hazou UN/MINUSTAH
photo_camera As drogas que viaxan por rutas aéreas son as máis afectadas (un.org)

A pandemia de coronavirus e a limitación de movementos que levou asociada na maioría dos países complicou tamén a produción e o tráfico de drogas a nivel mundial, segundo un informe das Nacións Unidas que constata especialmente os efectos que tiveron as restricións no contrabando por vía aérea.

A Oficina da ONU contra a Droga e o Crime (UNODC) examinou os efectos dos novos controis no narcotráfico, en particular para aquelas drogas que viaxan entre continentes. Este sería o caso das drogas sintéticas, como as metanfetaminas, que previsibelmente sufrirían de forma "drástica" as restricións ao tráfico aéreo.

A cocaína, en cambio, circula principalmente por mar e, segundo a UNODC, seguíronse rexistrando grandes cargamentos durante a pandemia. As rutas marítimas tamén estarían repuntando no caso da heroína, para as que os traficantes viñan utilizando principalmente vías terrestres.

Os expertos non prevén que o cannabis se vexa afectado na mesma medida, dado que "a súa produción adoita ter lugar perto dos mercados de consumo", din.

Segundo a ONU, varios países xa detectaron unha redución da venda de drogas a pequena escala, o que afectaría principalmente o consumo con fins recreativos. Preocupa, non obstante, un posíbel cambio entre os consumidores de heroína, que poderían derivar noutros produtos máis fortes como o fentanil e os seus derivados.

A ONU detectou, ademais, un aumento do consumo de produtos farmacéuticos como benzodiazepinas, que nalgúns casos viron duplicado o seu prezo, e na menor dispoñibilidade de produtos utilizados no caso de drogas inxectadas, algo que podería derivar no uso compartido de xeringas.

Colleitas afectadas

A UNODC prevé que a próxima colleita de opio no Afganistán, entre marzo e xuño, tamén se vexa afectada pola escaseza de man de obra, dado que os potenciais xornaleiros poderían non poder ou non querer desprazarse ás áreas de cultivo polo  coronavirus.

En Colombia, a produción de cocaína estase a ver prexudicada pola falta de combustíbel, mentres que en México a fabricación de drogas sintéticas foi a menos pola escaseza de precursores químicos do sueste asiático.

En Bolivia, a pandemia está a limitar a capacidade das autoridades para controlar o cultivo da coca. Isto, di a UNODC podería derivar nun aumento da produción. No caso do Perú, pola contra, os expertos estiman que a caída de prezos podería desalentar a produción.

Todo iso, porén, pode variar a medio e longo prazo. "A inminente crise económica pode levar a máis agricultores a se pasaren ao cultivo da coca nos principais países produtores de cocaína", apunta o informe.

Comentarios