Representantes dos tres partidos políticos con asento na corporación municipal -PP, PSdeG e BNG- sumaranse aos actos para, indican os organizadores, “facer xustiza con estes veciños asasinados e a todas as persoas que sufriron a represión por seren demócratas e persoas de ben”. En Mondoñedo mataron oito veciños e outras oito persoas de Ribadeo, A Pastoriza e Viveiro.
Para renderlles homenaxes, o 12 de xaneiro comezará a mediodía cun acto ao carón do cemiterio vello, onde foron asasinados González Rivas, Paz Amieiro e Rodríguez Núñez. Alí falará o cronista oficial da vila Antonio Reigosa; o neto de Siervo González, Pedro González; o de Graciano Paz, Graciano Pardo, e mais o sobriño neto de Manuel Rodríguez, Xusto Lage. Tamén intervirán membros dos partidos políticos.
A continuación, descubrirase o monólito, sufragado polo Concello de Mondoñedo, que “perpetuará a lembranza dos sucesos”. Os tres sindicalistas -militantes da Sociedade de Obreiros Católicos, da CNT e da Unión Socialista Galega- foron asasinados o 11 de xaneiro de 1938 no lugar da Rocha, ao carón da Travesía dos Remedios.
Un mesa redonda cos familiares dos represaliados na Casa da Xuventude, antiga sede da Sociedade de Obreiros Católicos, ás 13.15 horas, reflexionará “sobre a personalidade e a traxectoria vital dos homenaxeados”. Un “xantar de convivio” ao que cómpre anotarse ([email protected] / 683148757) porá o ramo á xornada.
