A batalla contra a Celulosa de Marín é unha das máis antigas do ambientalismo galego. Nestes intres, a APDR esixe a “anulación definitiva da prórroga de Ence”, que a empresa abandone Lourizán e que, tal e como di a lei, “devolva a zona ocupada á situación anterior á súa chegada”. Que foi, en pleno franquismo, en 1958.
A marcha de protesta estendeuse máis de tres quilómetros até as portas mesmas de Ence. “A ría é nosa / e non da Celulosa” ou “Ence, PP / a mesma merda é” foron algunhas das consignas máis secundadas polas asistentes. Entre elas, o alcade de Pontevedra Miguel Anxo Fernández Lores, o deputado de En Marea Antón Sánchez, a do PSOE Patricia Vilán ou a portavoz do Bloque en Europa Ana Miranda.
O presidente da Asociación pola Defensa da Ría, Antón Masa, afirmou que a deste domingo será “a última marcha contra a Celulosa con actividade en Ence”. Masa lembrou que en 2018 augurou que a de 2019 será a primeira sen Elnosa “e así é”. “A prórroga do Goberno en funcións de Raxoi a Ence non só foi irregular senón ilegal. A Dirección Xeral de Costas do Estado recoñéceo”, engadiu.
O activista explicou que ningunha instalación pode permanecer en dominio público máis de 75 e que, de se admitir a prórroga mencionada, serían 130 anos os que Ence estaría na ría de Pontevedra.
O alcalde da cidade, Miguel Anxo Fernández Lores, que acaba de revalidar o posto por sexta vez consecutiva, asegurou que o Concello empregará “todos os mecanismos posíbeis para conseguir o obxectivo final, trasladar Ence e recuperar a ría”. Antón Sánchez, de En Marea, acusou ao PP de “estar ao servizo de Ence” e que a situación a respecto da Celulosa é exemplo “das políticas corruptas” do partido de Feixoo.
Nota: imaxes da manifestación. Fotos: Adega.