A traiñeira mixta de Mecos-Coruxo proclamouse este domingo en augas de Meira, Moaña, campioa de España en categoría feminina. Un triunfo logrado ao se impoñer ás outras dúas embarcacións participantes, Tirán e Ribeira. As rapazas de Mecos e Coruxo eran sinaladas desde o principio como as grandes favoritas a erguer a bandeira deste campionato, o que as vogadoras refrendaron sobre as augas.
Santurtzi é a traiñeira gañadora do Campionato de España en categoría masculina, un título que conquistou cinco veces nos 72 anos de historia desta competición. Marcou un tempo de 19:36:86, impoñéndose así ás outras tres clasificadas para a fase final e na que había unha única representante galega, Ares. A medalla de prata foi para Ziérbana e a de bronce para Donostiarra.
A última vez que unha traiñeira galega gañou en categoría masculina foi en 1997, con Tirán.
Os campións territorias renunciaron a participar no Campionato, o que privou a proba de contar con algunhas das mellores traiñeiras do momento, como Hondarribia ou Cabo de Cruz.
