Representantes de entidades Lgtbi participaron dun encontro en Pontevedra co voceiro de En Marea, Luís Villares, e as candidatas Iris Malvido e Jorge Lorenzo.
Villares afirmou durante o acto que a lei Lgtbi aprobada en 2014 polo Parlamento Galego supuxo unha oportunidade para recoñecer todos os dereitos da comunidade, mais lamentou que o resultado fosen “moi pobres” pois, como salientou, fica aínda pendente desenvolver practicamente o contido da lei.
Fica aínda pendente desenvolver practicamente o contido da lei galega
Exemplificou este atraso co feito de que aínda se continúe a agardar polo desenvolvemento dun “protocolo específico contra o bullyng no ámbito escolar”; e denunciou a este respecto que as institucións galegas non teñan realizado este protocolo, pois “provoca unha incapacidade dos centros escolares á hora de abordar e solucionar os problemas", afirmou o voceiro de En Marea.
A formación galega que se presenta ao Congreso e ao Senado polas catro circunscricións galegas, esixiu tamén a creación de unidades sanitarias capaces de atender as persoas menores trans, “que se atopan cun sistema que non está preparado para facelo”, asegurou Villares, e sinalou que o Sergas debe asumir de forma inmediata o cambio de sexo como unha operación incluída dentro do catálogo de prestacións sanitarias, “e sen burocracia".
Desde En Marea demanandan que as administracións teñan que adoptar unha posición activa e favorecer a visibilización
Desde En Marea demanandan que as administracións teñan que adoptar unha posición activa e favorecer a visibilización, “porque moitas veces o rexeitamento ten que ver co descoñecemento”, asegurou Villares, e propuxo a aprobación de normas que recollan a non discriminación específica contra o colectivo LGTBI.
Unha das persoas representantes do colectivo trans que participou no acto, Aura Leirós, reiterou a necesidade da aprobación dunha Lei trans “ante a ameaza dos populismos” e cargou contra as medidas que defenden algunhas opcións políticas de suprimir as intervencións de cambio de sexo.
Leirós concluiu lembrando a alta taxa de persoas que se suicidan e a elevado número de asasinatos de persoas trans no estado español, e urxiu ás institucións a traballar para rematar con esta problemática.