Polas páxinas de Máis Nunca Máis desfilan algunhas sinaturas célebres, por caso as dos escritores uruguaios Mario Benedetti e Eduardo Galeano, a do portugués José Saramago, e, por suposto, de galegos coma Manuel Rivas, Suso de Toro, Manuel Lourenzo ou Xosé María Álvarez Cáccamo. Pero o libro serve ademais de repositorio de documentos anónimos ou de diversos colectivos.
“Neles está a memoria daquela loita contra a incompetencia dos gobernantes, que fixeron dun accidente a catástrofe da marea negra do Prestige”, explican os organizadores do acto de presentación, que contará coas intervencións de Rivas -autor do prólogo da obra-, Xosé Lois Vázquez -o editor-, Xurxo Souto -autor do epílogo-, o músico Pulpiño Viascón e mais Celtia Sar.
Foi Sar quen, en 2002, redactou unha carta dirixida ás deputadas e deputados do Congreso que comezaba: “Señoras e señores Deputados: chámome Celtia, teño 10 anos e vivo en Muxía, que é a primeira zona á que chegou o chapapote. Nesta época do ano estariamos escribindo a carta aos Reis Magos, pero polas circunstancias que estamos sufrindo desgrazadamente terémosvola que escribir a vós”.
A presentación do libro enmárcase dentro da programación da exposición Máis Nunca Máis, da asociación cultural Unha Gran Burla Negra, inaugurada o pasado 17 de xaneiro e aberta deica o 3 de marzo no Palexco da Coruña.