Galiza ten o triste privilexio de figurar entre os territorios que menos axuda prestaron ás traballadoras e traballadores autónomos neste período. Boa parte delas só se puideron beneficiar das axudas do Estado español, como o subsidio por cese de actividade, xa que a Xunta carecía de axudas directas.
O propio conselleiro de Economía, Francisco Conde, recoñecía, dous meses despois do inicio do estado de alarma, que os mecanismos postos en marcha a través do Instituto Galego de Promoción Económica (Igape) eran "insuficientes".
"Somos conscientes de que as axudas son insuficientes, por iso estamos a traballar nun paquete adicional no eido do comercio e do turismo, que traeremos a esta cámara, para que poidan afrontar a situación", sinalara Conde na súa recente comparecencia no Parlamento.
As autónomas representan 58% do tecido empresarial galego, de aí que a necesidade de axudas sexa, se cadra, máis importante que para outros sectores e non se pode limitar á doazón de material de protección.
Préstamos do ICO
Na súa comparecencia, Conde tamén aproveitou para sinalar que o Igape xa ten resoltos o 100% dos expedientes das entidades financeiras da liña de créditos. "Anticipámonos, neste momento temos 24,5 millóns de euros de axudas que se poden acudir a elas até setembro", subliñou.
Esta será unha alternativa para moitas das autónomas que, pese a pedir un dos préstamos avalados polo Instituto de Crédito Oficial (ICO), non resultaron beneficiarias dos mesmos. E é que, como recoñecen desde a Asociación de Traballadoras Autónomas (ATA), en todo o Estado español denegáronse unhas 300.000 solicitudes. Na súa gran maioría, apuntan, foron rexeitadas polos departamentos de risco dos bancos, que son os que aproban o crédito antes de pasarlle a petición a ICO. O Estado avala 80% do crédito, pero 20% restante póñeno as entidades financeiras, que miran moito polas súas ratios de mora.
63% en activo
A boa noticia para estas traballadoras é que a progresiva apertura dos estabelecementos coa entrada dos diferentes territorios na fase 1 do desconfinamento favoreceu a volta á normalidade de boa parte das autónomas. Segundo os datos dun informe da Asociación de Traballadoras Autónomos (ATA), 22% mantiveron os seus negocios abertos desde que se decretou o estado de alarma.
Co novo escenario, na Galiza esta porcentaxe chega xa 63,1%, un dato que invita ao optimismo, xa que só Murcia (68,9%) e Nafarroa (66,9%) superan esta porcentaxe.
Como explica o seu presidente, Lorenzo Amor, os territorios nos que hostalaría, comercio ou turismo teñen maior peso correspóndense cos que menos incorporacións rexistran. No outro extremo, nos que predomina a industria, a agricultura e a gandaría teñen máis autónomas activas.