![[Imaxe: Iain Colquhoun] Eucaliptos](/asset/thumbnail,1280,720,center,center/media/nosdiario/images/2018/01/04/2018010411441352243.jpg)
A inicios de 2017 o goberno portugués anunciaba a súa intención de activar unha lexislación para fixar unha moratoria para o eucalipto, especie que ocupa 26% da superficie forestal portuguesa. Na actualidade hai 811.000 hectáreas plantadas con esta especie no país veciño, 100.000 máis que hai dúas décadas.
En febreiro deste ano, 2018, entraba en vigor a lei coa que o goberno de António Costa quer frear o eucalipto. A industria papeleira e pasteira, ligada ao eucalipto, procurou alternativas a este novo escenario. E unha delas atópaa en Galiza, país onde o eucalipto ocupa por volta de 290.000 hectáreas da superficie arborada.
Segundo a noticia publicada no Faro de Vigo e asinada por Lara Graña, a papeleira lusa The Navigator Company (antiga Portucel) arrendará predios en Galiza para estabelecer as súas propias plantacións de eucaliptos.
A firma procuraría “crear unha base forestal en Galiza” en base a terreos privados sen explotar máis xa poboadas con eucaliptos. “A actividade de The Navigator Company en Galiza contribuirá á recuperación de áreas de eucalipto”, indica a compañía.
