O secretario xeral de Podemos e deputado nas Cortes Xerais, Antón Gómez Reino, preséntase ao Congreso encabezando a candidatura da Coruña de En Común-Unidas Podemos. Declárase como activista social desde moi novo e, ademais, forma parte da Marea Atlántica.
Que se xoga o pobo galego nas vindeiras eleccións do 28A?
O 28 de Abril a cidadanía galega xógase o seu futuro.
Xógase poder chegar con dignidade a fin de mes. Xógase ter un goberno que defenda unhas pensións xustas, nun país no que o 25% das galegas e galegos son pensionistas. Xógase ter salarios dignos, cunha suba substancial do SMI, nun país cos terceiros salarios máis baixos de todo o estado.
O 28-A xogámonos conservar e poñer en valor todo o noso potencial e toda a nosa riqueza
Xógase entrar definitivamente no S XXI. Iso só é posíbel se contamos cun sistema de transporte e cunha dotación de infraestruturas modernas e eficaces que permitan vertebrar o país. Iso tradúcese nunha rede de estradas seguras, nun tren de proximidade que conecte as cidades e vilas coas súas contornas, nunha AP-9 gratuíta e xestionada por Galiza, nunha aposta clara polos medios de transporte alternativos e, por suposto, nun cumprimento co calendario comprometido respecto ao AVE.
O 28-A xogámonos conservar e poñer en valor todo o noso potencial e toda a nosa riqueza. Para iso é preciso termos un modelo produtivo e de creación de emprego que sexa de calidade, sostíbel no tempo, respectuoso co medio e tamén compatíbel coa vida.
Un modelo enerxético que permita ter unha factura eléctrica accesíbel a todos os fogares.
E un modelo cultural que defenda os nosos dereitos lingüísticos, o noso patrimonio e a nosa memoria colectiva.
Que lectura fai da lexislatura anterior a respecto de Galiza?
A pasada lexislatura supuxo un salto cualitativo respecto da presenza, participación e intervención de Galiza nas políticas do Estado.
O noso grupo puxo enriba da mesa unha Axenda Galega do Cambio, é dicir, unha folla de ruta para que o Estado cumpra con Galiza. Cuestións fulcrais para as galegas e galegos formaron parte das políticas de estado e foron protagonistas na actividade do Congreso grazas ao traballo do noso grupo. Cuestións como: a problemática de Ence, o porto da Coruña, a AP-9 gratuíta, financiación autonómica, a devolución ás galegas do Pazo de Meirás e de todos os bens usurpados polo franquismo, recoñecemento das pensións dos mariños de Long Hope, o tren de cercanías para as áreas metropolitanas por citar algunhas das iniciativas que fixeron que Galiza fora protagonista.
Cales serían para vostede as tres principais problemáticas que afectan a Galiza?
Os problemas de Galiza son múltiples e diversos, mais se tivera que concentrar en tres problemas fundamentais serían: desigualdade e falta de oportunidades, a necesidade de vertebración e cohesión do territorio galego e a falta de modelo produtivo, enerxético e cultural.
Que deputada ou deputado sería referente para o seu labor no Congreso?
Creo que a ninguén se lle escapa que a presenza de Yolanda Díaz no Congreso foi un auténtico exemplo a seguir e que será unha ministra extraordinaria no próximo goberno.
Yolanda Díaz será unha ministra extraordinaria no próximo goberno
Na pasada lexislatura a súa interlocución directa nas negociacións co goberno do Estado en cuestións fundamentais como pensións ou o SMI, tiveron como resultado conquistas históricas para o conxunto das galegas e dos galegos.
Cal será a primeira iniciativa que defenderá no Congreso?
Por suposto isto depende dos ritmos e inercias da actividade parlamentaria, mais o noso compromiso é férreo co impulso dunha lei antideslocalizacións para que as empresas que teñan recibido cartos públicos non poidan marchar en dez anos, e se o fan, teñan que devolver eses cartos, iso evitaría a situación que están vivindo o persoal traballador de empresas como Alcoa ou Poligal.
Tamén temos o férreo compromiso de impuslar unha lei do solo que impida construír, sen excepción, sobre terreo queimado e por suposto, levaremos ao Congreso unha suba do salario mínimo interprofesional.
Como ve as opcións de En Común-Unidas Podemos na cita electoral?
En Común-Unidas Podemos saímos o 28 de abril a gañar, co firme convencemento de que teremos representación nas catro provincias galegas.
É algo que xa conseguimos no 2015 e que desta vez, despois do traballo nesta lexislatura do que estamos plenamente orgullosas, teremos máis fácil de acadar.