Imprimir

A hostalaría exixe ser indemnizada por Feixoo

A. Escuredo | 12 de xaneiro de 2021

Protesta da hostalaría da Coruña na praza María Pita (Nós Diario)
Protesta da hostalaría da Coruña na praza María Pita (Nós Diario)
O Goberno galego volve identificar o aumento de contaxios coa apertura da hostalaría. A indignación provocou varias accións de protesta e a petición unánime de medidas económicas directas.

As novas restricións da Xunta da Galiza á hostalaría e os negocios de ocio nocturno saben a castigo no sector. Cando o conselleiro de Sanidade, Julio García Comesaña, anunciaba a pasada sexta feira os datos da pandemia ao remate das festas de Nadal e as novas medidas para os locais, co fechamento interior, novos horarios e atención a un máximo de catro persoas nas terrazas, certificaba que o punto de mira do Goberno galego estaba nos bares e restaurantes.

Na pasada segunda feira as asociacións de Compostela iniciaron as protestas diante da residencia do presidente da Galiza, Alberto Núñez Feixoo, e esta terza feira a mobilización foi na Coruña. Denuncian que se está a criminalizar a súa actividade e que non contan con indemnizacións como acontece noutros países europeos.  

"O que reclamamos é unha non discriminación do noso sector con respecto a outros e pór en evidencia que a mobilidade se dá tamén noutras actividades, non só na hostalaría", asegura a Nós Diario o voceiro de Hostalaría Compostela, Lois Peres, "se a solución é fecharnos hai que indemnizar", engade. Esa petición é unánime en todas as entidades, unha vez coñecidas as medidas que tomaron outros países como foi o caso de Alemaña.

"Se é certo o que di Feixoo de que fechando a hostalaría baixan os contaxios paramos sen problema, mais cunha indemnización acorde ao que é o negocio, como en Europa, en función do nivel de facturación, e non esmolas", afirma Lopes. 

Cheché Real: "Temos que pagar taxas e impostos sen ter ingresos"

"Somos o único sector que está afectado directamente por restricións e limitacións", lembra Cheché Real, presidente da asociación da Asociación Provincial de Hostaleiros de Lugo (Apehl). Alerta a Nós Diario de que tamén está en perigo "toda a cadea de valor que está ao redor da hostalaría, como o caso do sector primario, que evidentemente está moi afectado". Explica que a situación económica "é caótica" porque "temos que pagar taxas e impostos sen ter ingresos". 

Dentro da hostalaría, a peor parte nestes meses levouna o ocio nocturno. Lucía Vázquez, membro da asociación de bares, pubs e discotecas de Compostela, é consciente de que "non aguantan máis". Comparte a apreciación do resto de asociacións cando considera que deben recibir "indemnizacións, porque os nosos negocios están intervidos pola Administración pública, e sen unha xustificación clara sanitaria nin sen estabelecerse ningún tipo de compensación nin de diálogo con nós". 

Outra das entidades que traballa o ocio nocturno é a asociación de salas de concertos Clubtura. Alberto Grandío, o seu presidente, ve "moi negro o ano 2021". Cre que moitos locais fecharán por non poder aguantar este inicio de ano.

"Tivemos unha pequena axuda e debería vir outra para os locais de concertos no mes de xaneiro mais non chega", asegura. Por este motivo, no seu caso reivindican "estar nun paquete de cultura" por ser, en moitos concellos, "a única posibilidade que teñen de asistir a concertos e permitir que o tecido cultural siga traballando".

A distribución para a hostalaría segue na incerteza 

As empresas de distribución de bebidas e alimentos manteñen a súa actividade baixo mínimos. José, comercial nunha empresa de distribución de bebidas con 40 persoas no seu cadro de persoal, explica a Nós Diario que é dos "afortunados" por contar cunha media xornada cando "hai quen non se incorporou desde marzo". Di que co 30% da hostalaría de Compostela aberta "sobramos a metade". Coas novas restricións, “o único que vendes son os cafés" por "non poder ocupar o interior e só dispor das terrazas". Di que "o cliente está moi queimado e máis cos cambios de última hora".

Feixoo e a mala xestión da pandemia na Galiza

A decisión do presidente da Xunta de abrir a mobilidade  total dentro da Galiza nos principais días das festas do Nadal causou indignación unha vez coñecido o seu resultado en forma de contaxios. "Eu non podo dicir que non o esperara", conta Vázquez, "cando se nos fai o feche encuberto de novembro nas asociacións falamos de que Feixoo deixaríanos abrir para a ponte de decembro coa idea de salvarlle as vacacións a eles e aos seus amigos e despois de reis volver a fecharnos", engade. 

"Se é unha cuestión de mobilidade consideramos que hai sectores que teñen máis", indica Lois Peres. Recoñece que son "un móbil tractor grande e se paramos tamén para moita actividade como pode ser a de comercios" mais tamén cre que hai que ter en conta o que acontece "co transporte e as grandes áreas comerciais".

A mesma reflexión fai Lucía Vázquez cando sinala que "levamos once meses con medidas estritas, non só para nós senón para toda a cidadanía con máscaras na rúa e distancia social "e logo as medidas e limitacións son diferentes como no caso dos autobuses ou os avións".

As asociacións da hostalaría coicidiron en manter as mobilizacións.

Todas as asociacións de hostalaría consultadas por Nós Diario coincidiron en asegurar que manterán as mobilizacións para que o Goberno galego non esqueza as súas reivindicacións. Neste sentido non descartan accións propias ou conxuntas por todo o páis. A última hora de onte fontes do executivo galego aseguraron que o vicepresidente primeiro da Xunta, Alfonso Rueda; o conselleiro de  Sanidade, Julio García Comesaña; e a responsábel do departamento de Emprego, María Jesús Lorenzana.manterían esta cuarta feira unha xuntanza con entidades do sector para valorar algunhas das  medidas a tomar.  

Podes ver este artigo na próxima dirección /articulo/economia/hostalaria-exixe-indemnizacions-feixoo/20210112205336113623.html


© 2021 Nós Diario