O sector da hostalaría continúa coas mobilizacións en protesta pola súa situación e para demandar accións contundentes por parte das Administracións galega e española. Hoxe concentráronse diante da sede da Consellaría de Sanidade en Compostela cun cento de participantes e o "agasallo" de caixas de bebidas na entrada das instalacións.
Desde a asociación Hostalaría Compostela, Lois López afirma que seguirán con este tipo de actos "de baixa intensidade" en número de asistentes coa idea de continuar coa visibilización da súa problemática e a exixencia dunha "solución para o sector en base ao plan de rescate que puxemos enriba da mesa". A razón de escoller a sede de Sanidade foi, segundo explica a Nós Diario, "por ser o día no que o Goberno toma decisións en base ao comité clínico".
En relación á xuntanza da pasada terza feira coa Xunta, López parabenízase de que o Goberno galego "acepte unha comisión de carácter técnico para perfilar as axudas ao sector", mais considera que a cifra de 12 millóns de euros "é insuficiente" ao relacionalas coas que darán en Euskadi (45 millóns de euros) e Murcia (38 millóns de euros), "ambas con menos poboación e locais que Galiza".
No caso concreto de Compostela, cre que "ao estar no nivel laranxa e baixando o número de casos" sería o momento para poder abrir. "Xa que nos explicaron que o fechamento foi pola situación concreta da cidade, agora que baixaron, queremos retomar a normalidade”, insiste.
O ocio nocturno, no límite
Na concentración tamén participaron locais de ocio nocturno da capital. O seu voceiro, Martín Zarauza, relata que teñen unha "situación peor" por levar nesta situación desde marzo, "quitando ese mes de 15 de xullo a 15 de agosto". Asegura a Nós Diario que "como axudas o único que temos son palabras en roldas de prensa.
Sobre as reais só hai unha por parte do concello de Santiago que foi para reformas feitas, é unha subvención para obras e non é para que sobrevivamos".
Do anuncio que realizou o presidente da Xunta, comenta que "12 millóns de euros para 2.200 locais que temos na Galiza após 10 meses de fechamento non arranxan nada". Por este motivo demanda a posibilidade de traballar. "Somos negocios solventes na súa maioría sempre e cando poidamos abrir", sentenza.
O sector convocou unha concentración para mañá diante da Delegación do Goberno na Coruña ás 12 horas.