O DOMINGO CONTINúAN OS PROTESTOS

Os gandeiros seguen ao pé de grandes cadeas comerciais

Os gandeiros galegos continúan os seus protestos con ringleiras de tractores situados onde grandes estabelecementos comerciais das cidades da Coruña e de Lugo.

[Imaxe: Campo Galego]
photo_camera [Imaxe: Campo Galego]

A Coruña e Lugo acollen un día máis as mobilizacións dos gandeiros galegos para reivindicar o aumento do prezo do leite en orixe. A día de hoxe os gandeiros reciben unha media de 27 céntimos por litro de leite, unha cantidade inferior aos 31-34 céntimos nos que se sitúan os prezos de produción.

Carrefour e o Día son as cadeas diante das que expón os tractores o sector, que segundo Unións Agrarias impediu hoxe o acceso de mercadorías a estes estabelecementos comerciais na Coruña e en Culleredo, mais permitiu o acceso ás persoas consumidoras. Precisamente, a campaña dos gandeiros céntrase en lle transmitir ás persoas consumidoras a súa problemática para as concienciar da necesidade dun prezo xusto que garanta os custos de produción.

Prevese que os protestos dos gandeiros continúen este domingo, polo que a xornada electoral non alterará os seus plans. Ademais, a segunda feira, 21 de decembro, o sector realizará asembleas nas que decidirá se desenvolven novas accións reivindicativas.

Comentarios