Imprimir

Galiza avanza á Fase 2

Redacción | 22 de maio de 2020

Praza Roxa de Compostela durante a fase 1 do desconfinamento (Imaxe: Arxina)
Praza Roxa de Compostela durante a fase 1 do desconfinamento (Imaxe: Arxina)
O ministro de Sanidade informou que as catro provincias pasan á Fase 2 a partir da vindeira segunda feira, 25 de maio. 

Galiza pasa á Fase 2, tal e como vén de anunciar o ministro de Sanidade, Salvador Illa, ao remate do Consello de Ministros. Un avance que afecta ás catro provincias galegas, se ben non se pronunciou sobre a demanda de libre mobilidade dentro do territorio galego, tal e como lle demandaban desde a Xunta e formacións como o BNG. . 

Núñez Feixoo, na súa comparecencia após o Consello da Xunta, indicaba que o conselleiro de Sanidade lle transmitiu a oposición do Goberno estatal neste punto, polo que o Executivo galego vai presentar alternativas, como que se poida pasar de provincia para visistar familiares maiores.

O paso á Fase 2 implica unha serie de flexibilizacións e novas medidas no proceso de desconfinamento.

1. Franxas horarias

Desaparecen as franxas horarias, agás para aqueles colectivos vulnerábeis, como as persoas anciás, e serán concellos e Gobernos autónomos quen teñan que delimitar os horarios para eses colectivos.

2. Reunións

A partir do día 25 as xuntanzas poden ser de até 15 persoas (na fase 1 o máximo foi de 10 persoas), aínda que hai que garantir a distancia interpersonal.

3. Apertura de locais de máis de 400 metros cadrados

Até agora, só as tendas con locais de até 400 metros cadrados poderían abrir ao público. A partir da fase 2 elimínase este límite. Iso si, acapacidade redúcese até 40% e, no caso de ter varias plantas, a presenza de clientes en cada unha delas debe manter esta mesma proporción. Establecerase un horario de atención prioritario para maiores de 65 anos.

4. Centros comerciais

A partir da segunda feira os centros comerciais poden reabrir ao público. A capacidade está limitada a 30% das súas áreas comúns e a 40% en cada un dos establecementos comerciais. Non se poden usar áreas recreativas como áreas infantís, ludotecas ou áreas de descanso e deben permanecer pechadas.

5. Hostalería e restauración

Segundo o recollido na orde, a partir do 25 pódese consumir dentro dos establecementos hostaleiros e restaurantes, cunha capacidade máxima de 40%, aínda que o ministro de Sanidade confesou que están a avaliar ampliar esta capacidade até 50%.

O consumo dentro do local só se poderá facer sentado nunha mesa, ou agrupamentos de mesas, e preferiblemente previa reserva. En ningún caso se aceptará o autoservizo no bar por parte do cliente. Non se poden abrir discotecas e discotecas.

6. Terrazas

As terrazas de establecementos hostaleiros deben manter a limitación de 50% das mesas, cunha ocupación máxima de 10 persoas..

7. Praias e piscinas

Na Fase 1 só se podía pasear polas praias e unicamente os deportistas poderían meterse na auga para nadar. Agora, flexibilízase eses requisitos e poderase bañar aquen así o desexe mais sempre cun "uso responsábel" e mantendo distancia interpersoal. Na praia permitiranse grupos de amigos até 15 persoas.

As piscinas recreativas poderán abrir, mais cun aforo m áximo de 30% ou o que permita cumprir coa distancia de seguridade. Organizaranse horarios por quendas. A limpieza debe facerse no mínimo 3 veces ao día e non poderán usarse as duchas dos vestiarios nin as fontes de auga.

8. Vodas

A partir da Fase 2, pódense celebrar cerimonias de voda en todo tipo de instalacións, públicas ou privadas, sempre que non superen 50% da súa capacidade. Poden asistir un máximo de 100 persoas en espazos abertos ou 50 persoas en fechados.

9. Residencias

O Goberno estatal deixa na man das comunidades autónomas permitir as visitas a familiares en residencias de maiores e de dependencia, sempre que estes centros non teñan usuarias con coronavirus ou en corentena. Será con cita, só poderá ir unha visitante por usuaria e levará posto material de protección. Nos centros de maiores as visitas realizaranse por supostos excepcionais, como a fin da vida ou o alivio de presión neurocognitiva da residente. 

10. Teletraballo

A recomendación continúa a ser a de fomentar o teletraballo mentres dure o desconfinamento. En caso de non ser posíbel, o centro de emprego ten que estar dotado de medidas de hixiene e tense que garantir a distancia de seguridade entre o persoal no espazo laboral e nas zonas comúns. De isto non ser posíbel, disporase de equipos de protección para previr o contaxio. Fichar co polgar fica prohibido, a non ser que se desinfecte o sistema despois de cada uso. Ademais, as empresas deberán adaptar horarios para evitar aglomeracións nas entradas e saídas. 

11. Cultura e lecer

Cines, teatros e espazos similares han de ter "butaca preasignada" e non superar un terzo da súa capacidade. Outros recintos fechados que non teñan butacas non poden superar nin 30% da capacidade nin 50 persoas no seu interior. Ao ar libre os eventos poderán xuntar até un máximo de 400 persoas sempre que sexa con cadeira, estean sentadas e se garde a distancia. As bibliotecas poderán abrir para as consultas en sala e para utilizar as computadoras, mais nunca poderán superar un terzo da capacidade. Tamén os museos teñen este límite de afluencia. 

12. Congresos 

Palestras e conferencias poden volver a realizarse, sempre que o espazo onde se desenvolvan non supere 30% da súa capacidade nin congregue máis de 50 persoas. 

13. Enterros

O número de asistentes aos velorios tamén aumenta coa fase dúas. Até 25 persoas poderán asistir a estes actos se son ao ar libre e 15 de se faceren en sitios fechados. A participación na comitiva para o enterro ou despedida para cremación dunha persoa falecida ficará, desde a segunda feira, restrinxida a un máximo de 25 persoas.

14. Culto

Permitirase a asistencia a lugares de culto sempre que non se supere 50% da súa capacidade. Deberanse cumprir as medidas xerais de seguridade e hixiene estabelecidas polas autoridades sanitarias.

15. Educación

Nesta fase poden abrir os centros educativos para crianzas desde os 0 aos 6 anos. As e os proxenitores deberán certificar a imposibilidade de teletraballaren. Moitos Gobernos autonómicos xa anunciaron que non abrirán estas escolas ao recoñecer a dificultade de manter entre as crianzas as medidas de seguranza. 

O presidente da Xunta da Galiza, Alberto Núñez Feixoo, anunciou que entre a segunda e a terza feira próximas, 25 e 26 de maio, coñecerase a decisión do Goberno galego a este respecto se, ben é certo,  o presidente que recoñeceu que a Sociedade Estatal de Pediatría non recomenda a apertura destes centros. 

Ademais, o Executivo estatal preveu que o alumnado de 4º de ESO, 2º de Bacharelato, 2º de Formación Profesional e de grao medio e superior poidan na fase dúas regresar á clase "con carácter voluntario". Feixoo defendeu a decisión tomada pola Xunta en relación a abrir os centros educativos nos niveis de 2º de Bacharelato e de FP. 

16. Deporte

Permítense o adestramento básico en ligas non profesionais federadas, o adestramento total en ligas profesionais e a reapertura de campionatos profesionais que se disputen a porta fechada ou, en todo caso,  con limitación da capacidade do espazo. Os espectáculos e actividades deportivas ao ar libre serán tamén con topes de afluencia.

17. Turismo

Os hoteis, que xa na fase inicial puideron abrir as súas habitacións, terán a posibilidade desde a segunda feira de abrir tamén as zonas comúns, sempre que non se supere un terzo da capacidade e se respecte a distancia física de dous metros. Tamén poden abrir as súas piscinas. A pesar desta flexibilización nos estabelecementos, non se pode ir a un hotel doutra provincia.

Podes ver este artigo na próxima dirección /articulo/social/galiza-pase-fase-2/20200522143138098191.html


© 2020 Nós Diario