A Xunta mantén o horario do toque de recoller de 23:00 a 6:00 horas decretado polo Goberno español o pasado domingo para todo o Estado con carácter xeral e que cada comunidade pode adaptar.
Así o anunciou hoxe o conselleiro de Sanidade, Julio García Comesaña, nunha rolda de prensa acompañado do xerente do Servizo Galego de Saúde (Sergas), José Flores, e da directora xeral de Saúde Pública, Carmen Durán Parrondo, para informar dos asuntos tratados na reunión comité clínico desta semana.
Comesaña subliñou que na Galiza "haberá restricións de mobilidade nocturna" e apelou aos cidadáns para cumprilas. Ademais, lembrou que nesta pandemia está a morrer xente. "É hora de tomar en serio as restricións", sentenciou.
O conselleiro recoñece a súa "preocupación" pola situación de Compostela, Verín e O Carballiño, ás que engade as áreas de Vigo e Ferrol.
A Consellería de Sanidade manterá as medidas de restrición vixentes con motivo da pandemia pola Covid-19 e seguirá unha "estratexia de monitoraxe continua" durante unha semana antes de estudar novas medidas no caso de ser necesarias.
A doutora Durán Parrondo explicou que "preocupa" a situación en comarcas como a de Santiago, Ferrol "especialmente", Pontevedra, Vigo, Ourense, O Carballiño, Verín e Lugo, tras un "empeoramento en catro días" rexistradona galiza, dun 20%, "a pesar de ser a cuarta comunidade con menor incidencia acumulada".
Por iso, Sanidade expón unha "estratexia de monitoraxe continua de todas estas comarcas" e "se se constata un empeoramento esta semana", puntualizou Durán Parrondo, "a comisión clínica terá que actuar en consecuencia e poñer en marcha medidas necesarias".