O portavoz do BNG no Parlamento galego, Francisco Jorquera defendeu, a través dunha proposición non de lei, constituír unha comisión de estudo sobre os ingresos e financiamento autonómico porque o actual sistema de financiamento segue sen revisarse, lembrou. Jorquera explicou que segundo o informe de estratexia financeira fiscal da Xunta, as achegas ao sistema de financiamento no ano 2015 son 6.112 millóns de euros, 1.327 millóns menos que no 2008 e 1.223 menos que no 2007. “Segundo os nosos cálculos, afirmou, co novo modelo Galiza leva perdidos 8.574 millóns de euros, o equivalente ao orzamento da Xunta nun exercicio”.
Perante esta realidade, reiterou Jorquera, a Xunta conténtase con que Galiza “sae ben parada nas balanzas fiscais inventadas por Montoro”. O portavoz parlamentar defendeu crear a comisión para que Xunta e grupos parlamentares acheguen os seus estudos, comparezan expertos e unha representación plural da sociedade, e cos números sobre a mesa, “concretemos as demandas a defender como país.”