O portavoz de Galicia en Común-Anova Mareas, Antón Gómez-Reino, compareceu esta tarde en rolda de prensa para salientar que "é unha absoluta irresponsabilidade pensar en convocar un proceso electoral" neste momento e avanzou que a coalición tomará medidas legais se o presidente da Xunta impón as urnas en xullo. "Búrlase da dor e o sacrificio dun país enteiro. Este é o luto do señor Feixoo?", dixo.
"Utilizaremos todos os mecanismos legais do Estado de Dereito para garantir que as eleccións se celebran cando non se poña en risco a saúde da cidadanía, cando existan plenas garantías democráticas. Nunca as eleccións no noso país poden estar por enriba da vida e nunca a estratexia partidista pode estar por enriba da saúde pública", asegurou Gómez-Reino.
"Feixoo quitouse a máscara do electoralismo e a máscara que debería levar para protexer ás galegas contra a epidemia da COVID-19 e contra a crise económica", engadiu.
Gómez-Reino advertiu que as eleccións galegas só poderán celebrarse "cando non se poña en risco a saúde dos cidadáns e cando existan plenas garantías democráticas de que ninguén deixa de pedir o voto, de decidir a súa opción de voto ou de ir votar por medo a contaxiarse ou por estar enfermo".
"A nós non nos vai contaxiar a súa irresponsabilidade", subliñou o portavoz, quen considerou "lamentábel" que o presidente da Xunta incumprira o acordo asinado co resto de forzas políticas galegas para suspender os comicios previstos para o 5 de abril, acordo que incluía o compromiso de consensuar a data definitiva dos mesmos. "A esta hora non temos comunicación algunha ao respecto", concluíu.
