Imprimir

Arte ao servizo do combate polas liberdades

Redacción | 22 de xaneiro de 2018

De dereita á esquerda, Luís Seoane, Isaac Díaz Pardo e Laxeiro, en Bos Aires en 1955.
De dereita á esquerda, Luís Seoane, Isaac Díaz Pardo e Laxeiro, en Bos Aires en 1955.

O pasado ano fixo 80 da publicación de 13 estampas da traizón. O debuxo antifascista de Luís Seoane (Bos Aires, 1910 – A Coruña, 1979), cuxos orixinais se expoñen na fundación coruñesa que leva o seu nome, serve de escusa para unhas xornadas sobre “guerra civil, propaganda e artistas de Galiza”, coordinadas pola profesora María Antonia Pérez e que se desenvolvarán entre o 1 e o 3 de febreiro.
 

“Ao longo de tres días, nove especialistas afondarán nas circunstancias históricas e culturais que rodearon a creación e publicación en 1937 de 13 estampas da traizón, o primeiro álbum de debuxos de Seoane”, indica a institución nun comunicado. A obra é un virulento ataque contra o bando franquista, con evidente pegadas do expresionismo de esquerda e a caricatura política de George Grosz.

cuberta 13 estampas da traizón

A quinta feira 1 de febreiro, a directora da fundación, Silvia Longueira, abrirá o ciclo. Despois será a quenda dos historiadores: Justo Beramendi disertará sobre o Partido Galeguista, ao que Seoane estaba adscrito durante os anos da República, e Emilio Grandío sobre “sublevación e control social nunha cidade ocupada”, en referencia á Coruña durante a guerra do 36.

 

Ao día seguinte, 2 de febreiro, o director da Biblioteca de Galiza da Cidade da Cultura, Daniel Buján, enacargarase de falar sobre o gravado na obra de Seoane. O historiador Eliseo Fernández tratará das relación entre o Partido Galeguista e a CNT, a cuxos militantes asesorou como avogado en non poucas ocasións. A profesora Pilar García Negro falará, pola súa banda, dos debuxos de guerra de Castelao.

 

No sábado 3 de febreiro o profesor Paulo Porta analizará outros debuxos de guerra, neste caso os do pintor pontevedrés Arturo Souto. María Antonia Pérez, que amais de coordinar as xornadas é codirectora canda Silvia Longueira, debruzarase sobre Seoane e Maruja Mallo “na propaganda de guerra en Bos Aires”. A proxección do filme documental 13 estampas da traizón, de Juan de la Colina, pechará os debates.  

 

As xornadas Guerra civil, propaganda e artistas de Galiza serán nas propias instalacións da Fundación Seoane, da Coruña. A inscrición nas mesmas é de balde.

 

Nota: cuberta de 13 estampas da traizón de Luís Seoane.

Podes ver este artigo na próxima dirección /articulo/cultura/fundacion-seoane-debate-propaganda-guerra-civil-galiza-arte-ao-servizo-do-combate-polas-liberdades-pasado-ano-fixo-80-da-publicacion-13-estampas-da-traizon-debuxo-antifascista-luis-seoane-bos-aires-1910-coruna-1979-cuxos-orixinais-exponen-fundacion-corune/20180122133012065284.html


© 2020 Nós Diario