Na noite de onte os habitantes de Carnota tiveron coñecemento de que un petroleiro, do que só se sabía que contaba con bandeira de Liberia, estaba á deriva nunha zona próxima ao faro de Lariño. A falta noticias e de dados oficiais preocupou a Costa da Morte, onde sobrevoaba a pantasma do “Prestige”.
Segundo publica La Voz de Galicia o buque ficaría a unhas nove millas dos baixos dos Meixidos cara a onde iniciou unha perigosa aproximación. O remolcador Don Inda, con base en Cee, achegouse ao petroleiro, aínda que non foi necesario o remolque.
Europa Press, citando fontes de Salvamento Marítimo, sinalou que "a última hora da tarde" o buque pediu autorización para "achegarse algo a terra" e poder recuperar metros da áncora. O Don Inda supervisou a manobra cando o "Front Serenade" se aproximou a 18 millas de cabo Corrubedo. O problema foi solucionado ás 23h.
O portal web www.marinetraffic.com informa que o petroleiro con porto base en Monrovia data de 2002, ten 330 metros de eslora e conta con 300.000 toneladas, é dicir, é tres veces maior que o “Prestige”. Segundo esta web de información marítima, prevese que o buque chegue a Rotterdam ás 15h do día de hoxe. No momento da edición desta noticia atopábase na latitude 43.8523º e na lonxitude -9-422267º.