Freixeiro Mato: "O bilingüismo é un paso intermedio que conduce á desaparición da lingua minorizada"

Sesquilingüismo -competencia en galego acompañada de coñecemento pasivo noutras linguas romances e europeas- e non bilingüismo harmónico nin “plurilingüismo” que agoche as políticas negativas para o idioma da Galiza. É unha das propostas que analiza o profesor Xosé Ramón Freixeiro Mato en Idioma e sociedade. Sobre normalización e planificación (Laiovento), o seu último ensaio, no que revisa varios dos vellos debates sobre este tema. O autor amósase favorábel á posibilidade do binormativismo e dun maior aproveitamento da proximidade co portugués.