Feijóo adía a 2020 a decisión do PP sobre unha nova candidatura de Rajoy

Rápida resposta de Feijóo ao desexo expresado por Rajoy de repetir mandato. Nunha nova incursión nos meios da caverna madrileña, entrevista na emisora de Jiménez Losantos, o líder do PPdeG adía a 2020 a decisión sobre o cartaz do partido nunhas novas eleccións estatais.

Feijoo
photo_camera Feijóo, nunha visita a Rajoy na Moncloa

"No ano 20, o presidente do noso partido, despois de ver o contido e alcance do que fixo o goberno nos últimos anos, despois de ver cal é o ambiente eleitoral e de ver que posibilidades temos de voltar a gobernar España, decidirá libremente e tranquilamente o que cre mellor. E en base a iso, o partido fará unha reflexión e concretará unha candidatura", dixo Feijóo interpelado por Federico Jiménez Losantos na antena de Es.Radio. "Ninguén [en alusión a Rajoy] vai tomar unha decisión en contra do PP e en contra de España", alegou.

Era un compromiso mediático de certo risco o que asumiu esta quinta feira Feijóo ao responder a chamada de Jiménez Losantos. Mais non un compromiso accidental nen casual. Fai parte de toda unha estratexia de comunicación de relanzamento da súa figura no taboleiro estatal, tal como a recente entrevista en La Razón, outra marca do aparato de propaganda do sector máis ultra e centralista da direita española. Aliás, Feijóo sabía que no temario da entrevista estaría invariabelmente o asunto da sucesión de Rajoy, após este declarar esta cuarta feira a súa disposición a voltar a ser candidato.

Jiménez Losantos milita desde hai anos na corrente anti-Rajoy da caverna. Non lle puido causar estrañeza a Feijóo que lle perguntase directamente se non estaría ben que -quer el quer Cristina Cifuentes quer Pablo Casado, outros líderes alternativos- apresentase a súa candidatura nun congreso aberto do PP, disposto por tanto a competir con Rajoy. A resposta de Feijóo foi bastante polo rego do previsíbel: "Son o presidente da Xunta. Comprometinme cos galegos a o ser até 2020 e esa é a miña tarefea. Servindo ao Estado desde a comunidade autónoma? Por suposto. Sendo o representante ordinario do Estado na comunidade autónoma, que é o que somos os presidentes das comunidades autónomas", respondeu.

As declaracións consecutivas de Rajoy e Feijóo admiten unha fácil esexese. O presidente do Goberno dixo literalmente que "a día de hoxe a miña intención é intentar repetir". Aquí os elementos chave de interpretación son a acotación temporal -"a día de hoxe"- e a indeterminación -"intentar repetir". Non sempre se consegue aquilo que se intenta. Por súa parte, Feijóo adía a decisión de Rajoy -que terá de ser referendada en todo caso polo partido, enfatizou- a 2020... xusto cando remataría o compromiso do titular da Xunta "cos galegos".

E como pano de fundo desta historia, o ascenso de Ciudadanos, con enquisas a colocar o partido de Rivera por cima do liderado por Rajoy, o que leva a que en círculos non pequenos do PP -sempre en privado- se defenda o relevo do político de Pontevedra ao fronte da candidatura nas xerais. Feijóo revelou que a principios de xaneiro mantivo un encontro con Rajoy en Galiza para lle trasladar a súa inquietude pola emerxencia da escadra laranxa. Sobre Cs, Feijóo combinou dous rexistos discursivos: ditirambos a Arrimadas pola súa campaña catalá -"tivo un excelente resultado e eu alégrome porque se non sobe o meu partido prefiro que o faga Ciudadanos a calquera outro"- e críticas á formación nada en Catalunya polo seu carácter "acomodaticio" -capaces de pactar ora co PP ora co PSOE- e a súa falta de fiabilidade, ao carecer de calquera experiencia de goberno. 

Comentarios