Os traballadores de Alcoa non son os únicos que viven con incerteza estas últimas semanas. Á espera de coñecer os plans da multinacional norteamericana, entre os que figura a posibilidade do feche da planta de aluminio primario e o despedimento dos seus 534 empregados, e dun posíbel movemento por parte das Administracións, que teñen na súa man a vía da intervención, os comerciantes tamén alertan das graves consecuencias que tería na comarca o cesamento de actividade desta planta, da que depende boa parte da economía da Mariña.
O presidente da Federación Galega de Comercio, José María Seixas, vaticinou un "caos" para o comercio da comarca e de todo o nordeste do país se finalmente fecha a factoría. "Non cabe dúbida de que, tal e como están as circunstancias, isto sería un novo golpe para o comercio da Mariña e non só da Mariña, senón para o comercio de Lugo", afirmou Seixas.
"Hai que ter en conta que economicamente o de Alcoa é unha porcentaxe moi importante na economía (30% do PIB de Lugo) e se non vai para adiante vai notar. As consecuencias serían nefastas nun curto prazo de tempo", advertiu.
O empresario lucense constatou que as persoas que se dedican ao comercio nesa comarca "teñen moito medo, saben que se non vai para diante (a venda a Liberty House ou a intervención do Goberno español) o feche de moitos negocios é case seguro", abundou. "Isto supoñerá un caos, e desaparecerán un bo número de negocios", aventurou.
Nas últimas semanas, a vía dunha intervención da planta vai cobrando máis forza. Na Xunta e no Goberno español falan abertamente desta posibilidade.
A este respecto, o responsábel da Federación Galega de Comercio sinala que viu estes días o que dicía a ministra de Traballo Yolanda Díaz, "que estaban niso" (solucionar o problema da factoría de San Cibrao). "Pero se son sincero o que diga esta señora hoxe, mañá non é verdade", lamentou.
"Estamos á espera coa ilusión de que se busque unha solución e que poidamos continuar con esta actividade ─a produción de aluminio─, que é tamén moi importante para o resto do Estado español", mais en especial para as persoas comerciantes que dependen da súa continuidade para manter abertos os seus negocios, concluíu.
