O Goberno español suspenderá a regra de gasto dos concellos nun novo decreto e permitiralles investir os cartos do superávit para facer fronte á crise.
Trátase dun xiro de 180 graos en Madrid, xa que a ministra de Facenda, María Jesús Montero, repetiu nas pasadas semanas que o único camiño para que os concellos puidesen empregar os cartos dos seus remanentes (liquidez obtida ao final do exercicio orzamentario) era a través da entrega ao Estado dos cartos do superávit aforrados durante anos polos municipios. A cambio, estes poderían empregar un fondo de 5.000 millóns de euros que o Estado repartiría en función de criterios como os poboacionais, ficando así localidades fóra da distribución.
Con ese pacto que Montero alcanzou coa Federación Española de Municipios e Provincias (Femp) presentou o decreto dos remanentes o pasado 10 de setembro no Congreso, colleitando a primeira derrota parlamentar do Executivo de coalición, pois a medida só logrou o apoio do PSOE, Unidas Podemos e Teruel Existe.
E é que previamente, durante o verán, coceuse unha rebelión en numerosos municipios que, tendo recursos económicos en forma de remanentes, víanse sen a posibilidade de empregalos en beneficio da veciñanza debido ás leis que estabelecen a regra de gasto (que ao seu tempo impón un teito de investimento), o concepto de défice e o de estabilidade.
"Lei Montoro"
A presidenta do PSOE, Cristina Narbona, defendeu que "rectificar é de sabios", en alusión ao novo decreto que anunciou Montero, mentres que para o presidente do PP, Pablo Casado, "Sánchez só acerta cando rectifica" e indicou que esta decisión "desautoriza" a ministra de Facenda e o presidente da Femp, o alcalde vigués Abel Caballero, que deben "asumir a súa responsabilidade por este fracaso".
A líder do BNG, Ana Pontón, demandou a supresión definitiva da "Lei Montoro" para que os concellos galegos poidan usar os 900 millóns de euros dos seus remanentes para combater a crise da Covid-19.
O novo decreto non incluirá o capítulo sobre remanentes
O Executivo quere agora presentar un novo decreto baseado no anterior, mais eliminando o capítulo dos remanentes. A nova norma suspenderá a regra de gasto para 2020 , prorrogará o uso do superávit para investimentos financeiramente sostíbeis e "concederá mellores condicións financeiras para concellos con problemas financeiros", dixo a ministra de Facenda nunha entrevista.
Tamén se permitirá concluír en 2021 os proxectos de investimentos iniciados en 2019 e que se estean financiando con superávit de 2018. Desta maneira, e a pesar de que non se poidan empregar todos os remanentes, os concellos poderán investir os cartos aforrados do superávit dos exercicios de 2018 e 2019. Os concellos con risco financeiro poderán pagar as súas débedas coa Axencia Tributaria e a Seguridade Social con recursos do Fondo de Ordenación.
