Galiza vai tomar parte na elaboración do primeiro censo do oso pardo que habita nos territorios da cordilleira cantábrica. Canda Asturias, Cantabria, Castela e León -baixo a coordinación do Ministerio para a Transición Ecolóxica e o Reto Demográfico- e co asesoramento do CSIC e a Universidade Autónoma de Barcelona, levarase a cabo por primeira vez un censo de oso pardo de maneira simultánea en todo a área de distribución do oso pardo cantábrico usando a mesma metodoloxía.
O oso pardo está incluído no Catálogo español e galego de especies ameazadas na categoría de “En perigo de extinción”, así como nos anexos II (especies para as que é preciso declarar zonas de protección) e IV (protección escrita) da Directiva Hábitats, con presenza na Galiza, e que conta cun plan de recuperación aprobado.
Os primeiros traballos, as prospeccións, que levarán a cabo están dirixidas á toma de mostras non invasivas desta especie (como por exemplo, mostras de excremento e pelo) durante o período que vai do 1 de setembro ao 15 de decembro de 2020.
O obxectivo desta primeira etapa é obter perfís xenéticos individuais de cada exemplar (baseados en utilización de Polimorfismos de Nucleótido Simples (SNPs) e realizar unha estima poboacional. Nunha segunda etapa, traballarase no grao de conectividade entre os núcleos da poboación e de parentesco entre os exemplares.
Desde a Consellería de Medio Ambiente indican que na Galiza mostrearanse 43 cuadrículas, 34 na provincia de Lugo, 4 en Ourense e 5 no Parque Nacional do Invernadeiro.
