Imprimir

O dicionario da RAG supera as 105.000 buscas de media ao día

Redacción | 13 de xaneiro de 2021

Imaxe do portal da Academia e do seu dicionario. (Foto: Nós Diario)
Imaxe do portal da Academia e do seu dicionario. (Foto: Nós Diario)
A Real Academia Galega (RAG) fixo público, na xornada de hoxe, o balance do número de visitas recibidas no portal do seu dicionario durante 2020. 

Á luz dos seus datos, o dicionario da Real Academia Galega (RAG) superou as 38.500.000 buscas, máis de 105.000 ao día de media, o que implica que as consultas medraron case 50% con respecto a 2019, ano no que xa se producira un incremento por riba de 18% con respecto ao 2018, cando se chegara ás preto de 26.000.000 procuras. 

Segundo a comunicación da Academia, a entrada en vigor do primeiro estado de alarma por mor da pandemia da Covid-19 marcou un punto de inflexión nestas cifras e rexistrou a marca histórica de buscas no mes de maio, que fechou con máis de 4.800.000. 

O dicionario en liña da RAG entrou en funcionamento en 2013 e, desde entón, “esta ferramenta esencial da lingua galega non deixou de medrar”.

Ademais aumentou a súa utilidade social “de maneira evidente durante o confinamento, cando milleiros de persoas tiveron que teletraballar e o estudantado continuou co proceso de aprendizaxe pero de modo telemático”.

Vocabulario e Covid-19

A Covid-19 non só deixou pegada no referido á consulta das ferramentas dixitais da Academia senón que tamén imprimiu a súa impronta entre as novas acepcións, en lemas xa presentes no dicionario.

A entrada de "gromo" incorporou así o significado referido á aparición súbita dunha enfermidade epidémica entre a poboación dun determinado lugar; e a de "repunta", a que atinxe á nova aparición de algo, especialmente cando se trata dunha enfermidade epidémica, nun lugar no que xa se daba por controlada ou, cando menos, en vías de desaparición.

Podes ver este artigo na próxima dirección /articulo/cultura/dicionario-da-rag-supera-105000-buscas-media-ao-dia/20210113204122113705.html


© 2021 Nós Diario