Até a data as vítimas mortais na Galiza por mor do coronavirus elévanse a 1.086, despois de que as autoridades sanitarias comunicasen na tarde de onte, segunda feira, outros 17 falecementos, dez deles de usuarias e usuarios de residencias de anciáns.
Sanidade informou de que, ademais das mortes rexistradas ao longo desta xornada de persoas diagnosticadas con Covid-19, a listaxe de 17 falecementos trasladado onte completa o reconto de fin de semana realizada por Saúde Pública, após comprobar que houbo máis casos de falecidos co virus.
Deste modo, das 17 persoas cuxo falecemento se notificou , dez procedían de residencias, oito delas faleceron nos propios centros e outras dúas en hospitais.
Contaxios
Os contaxios de Covid-19 seguen en descenso tras sumar 409, deles 388 confirmados por PCR nas últimas 24 horas, fronte aos 489 de onte. Tamén os casos activos baixan a 9.060, medio cento menor que a xornada anterior.
Así se desprende dos datos actualizados na mañá desta terza feira na web da Consellería de Sanidade, con cifras até as 18:00 horas de onte, recollidos por Europa Press, nos que se constata que na área sanitaria de Vigo confirmáronse 97 contaxios por PCR nas últimas 24 horas; 67 na de Pontevedra e O Salnés; 63 na da Coruña e Cee; 55 na de Lugo; 41 na de Santiago e Barbanza; 39 na de Ferrol; e 26 na de Ourense.
En canto aos casos activos, baixan en cinco do sete áreas sanitarias galegas, mentres que na de Santiago e Barbanza mantéñense igual que este luns e na de Lugo ascenden lixeiramente.
As persoas con coronavirus Covid-19 hospitalizadas na Galiza descenderon lixeiramente a 609 -unha menos que este luns-, das cales 106 permanecen en UCI -catro menos-.
