Dez minutos para a esperanza

A Real Sociedade inaugura o marcador de vitorias en casa fronte a un Celta que só creou perigo na recta final do partido.

celta
photo_camera Kevin Vázquez debutou co Celta en Primeira División.

Estreábase Miguel Cardoso no banco do Celta mais iso non trouxo unha vitoria. Os celestes volveron recuncar en erros de vello e asinaron un encontro, por dicilo amabelmente, frouxo e cativo. O espertar na recta final dá marxe para a esperenza, de ser esa a liña que vaia predominar de agora en diante.

A Real Sociedade logrou a súa primeira vitoria en Anoeta no que vai de tempada (2-1). Apostaron os ‘giputxis’ por unha presión alta para acurralar un Celta que mantén a aposta en sacar a bola xogada desde atrás. A Erreala tivo a súa primeira oportunidade nas botas de Januzaj, que estrelou a pelota no pao. Pouco despois Aspas tivo a oportunidade de adiantar o Celta ao ficar so perante Moya, mais esvarou cando ía tirar.

Cando se entraba na fase final da primeira metade adiantábase a Real, que ampliaba distancias cun segundo gol ao pouco de iniciar a segunda. Foron os mellores momentos da Real, que a piques estivo de meter o terceiro gol.

Porén, non foi quen de facelo e entón o Celta tomou o control do partido. Maxi Gómez (que comezara o partido no banco) recurtou distancias e os celestes entón foron a por todas, vivindo os donostiarras momentos de agobio. Non foi abondo e o Celta acabou cunha nova derrota, a primeira da era Cardoso.

No lado positivo da balanza, o debut dun novo canteirán coa equipa en primeira división: Kevin Vázquez. O lateral completou todo o partido que os celestes xogaron ante a Real Sociedade e participou no gol anotado por Maxi Gómez.

Ficha técnica

R Sociedad (2): Moyá; Zaldua (Gorosabel, min.86), Héctor Moreno, Llorente, Theo; Zubeldia, Zurutuza (Sandro, min.78), Oyarzabal, Juanmi, Januzaj (Merino, min.63) e WilliaM.

RC Celta (1): Sergio; Kevin, David Costas, Araujo, Juncá; Brais, Okay (Sisto, min.86), Jozabed; Hjulsager, (Boufal, min.59) Aspas e Emre Mor (Maxi Gómez, min.46).

Goles: 1-0, 36: Oyarzabal; 2-0, min.47: Sergio; 2-1, min.83: Maxi Gómez.

Árbitro: Melero López, do comité andaluz. Amoestou Juncá, Maxi Gómez, Sandro, Oyarzabal

Comentarios