A Deputación apoiará a musealización da casa de Dieste

A vicepresidenta da Deputación da Coruña, Goretti Sanmartín, vén de comprometerse nunha visita a Rianxo a financiar boa parte da restauración e musealización da casa de Rafael Dieste como “un chanzo importante no camiño do proxecto de Rianxo como vila literaria de referencia para a cultura galega”.

dieste-deputac
photo_camera Visita de Goretti Sanmartín esta mañá á Casa de Dieste

Na casa de Rafael Dieste en Rianxo, Goretti Sanmartín comprometeu o apoio da Deputación da Coruña para iniciar o proceso que converterá a casa natal do escritor Rafael Dieste nun museo arredor da súa figura que tamén recordará outros membros da súa familia como o enxeñeiro Eladio Dieste. Na Rúa de Abaixo, Goretti Sanmartín destacou a singularidade de que “nesta mesma rúa  naceron tres grandes figuras da nosa cultura, Castelao, Manuel Antonio e o propio Rafael Dieste, unha coincidencia única que lle outorga ao concello unhas condicións singulares para se converter en vila literaria de referencia para o país e para a nosa cultura”.
 
Da man do alcalde de Rianxo, Adolfo Muíños, Goretti Sanmartín e a deputada da comarca, a nacionalista Ánxela Franco, coñeceron o proxecto de adecuación do inmóbel para usos museísticos, na liña do proceso que seguiu a casa de Manuel Antonio, aberta xa a visitas públicas e ao pé da de Castelao. Á xuntanza asistiron tamén a concelleira de Rianxo Adelina Ces, e o arquitecto do proxecto Amancio Losada e o investigador e académico, Xosé Luís Axeitos, especialista nas figuras de Dieste e Manuel Antonio e asesor do proxecto.
 
O alcalde, Adolfo Muiños, parabenizouse por “abrir hoxe a casa de Rafael Dieste despois de tantos anos grazas ao apoio da Deputación que dá o impulso definitivo para a súa apertura ao público, para mostrar un espazo que foi central no encontro cultural e recuperar a memoria dunha figura de importancia central non só na nosa cultura senón de referencia no mundo, tamén pola súa relación coa cultura latinoamericana con figuras como as do escritor Roberto Bolaño que mostrou a súa admiración polo escritor rianxeiro”. Muíños estimou en 230.000 euros o orzamento necesario para acometer as obras que permitirán acondicionar o inmóbel para incorporar o mobiliario orixinal ao recaudo do Concello e proceder xa á apertura como espazo musealizado.
 
Goretti Sanmartín destacou as potencialidades de Rianxo á hora de atraer visitantes con interese pola nosa cultura, á maneira de cidades e vilas europeas que teñen no turismo cultural e na condición de espazos literarios as súas principais cartas de presentación. Mostrou así o apoio decidido da Deputación da Coruña a dar o pulo definitivo que permitirá restaurar a casa de Rafael Dieste e proceder a súa apertura ao público.  O alcalde preferiu non dar prazos de apertura mais asegurou que “o apoio da Deputación é definitivo para falar xa da futura e próxima apertura da casa-museo de Rafael Dieste”. Pola súa parte, Goretti Sanmartín gabou a “planificación” por parte do Concello de Rianxo do proxecto que se atopa, segundo dixo, moi estudado nas súas distintas fases, mesmo coa localización do que será a futura colección de obxectos e documentos do museo. 

De titularidade municipal

A casa de Rafael Dieste sitúase na rúa de Abaixo n. 46 é de titularidade municipal desde o ano 2007 e o concello conta co apoio e a disponibilidade da familia para o proxecto de musealización. Alí naceu Dieste e alí pasou tamén a derradeira etapa da súa vida, á volta do seu exilio americano. O proxecto procurará reproducir os espazos habitados por Rafael Dieste e Carmen Muñoz e o concello conserva, entre outros, o mobiliario orixinal do salón así como elementos doutras estancias.

A vivenda está construída en pedra e consta de planta baixa e primeira. A intervención, que se insire dentro da adaptación museística e museográfica, recuperará os espazos da vida de Rafael Dieste, incluída a biblioteca e unha colección de fotografías, documentos e obxectos persoais. A través dos distintos lugares percorreranse as distintas etapas da vida do escritor e recuperaranse nas condicións da época os espazos compartidos por Dieste e Carmen Muñoz no inmóbel, unha edificación que abre as súas fiestras tamén á cultura mariñeira. A casa albergará tamén un espazo para exposicións temporais arredor do escritor, o seu mundo e os tempos que viviu. O proxecto permitirá reforzar a condición de Rianxo como vila literariae sumará un novo espazo museístico á casa de Manuel Antonio, consolidando unha marca de identidade da que se agardan repercusións a nivel turístico e económico.
 

Comentarios