A CIG-Saúde denuncia a actitude da sanidade privada que “fronte a alarma sanitaria que estamos a vivir” responde “pechando as súas camas hospitalarias, despedindo o persoal ou limitando os seus dereitos laborais”. Por este motivo puxéronse en contacto coa consellaría para exixir que obrigue a estas empresas sanitarias a “manter abertas as súas instalacións, mantendo as súas traballadoras e traballadores e poñendo os seus recursos materiais e humanos a disposición do sistema sanitario público”.
A secretaria nacional de CIG-Saúde, María Xosé Abuín, explica que estes centros hospitalarios da sanidade privada traballan durante todo o ano cunha importante carga asistencial derivada da sanidade publica. Por iso considera que o seu comportamento é “desleal e irresponsábel coas medidas excepcionais dirixidas a garantir a dispoñibilidade de centros e de profesionais, para facer fronte á asistencia crecente derivada do coronavirus”.
CIG-Saúde non entende que na situación de emerxencia sanitaria actual non se respecte o Real Decreto 463/2020, do 14 de marzo, e as ordes ministeriais publicadas para a súa correcta aplicación. Nelas recóllese que os centros de titularidade privada contribuirán a reforzar o sistema de saúde en todo o territorio do Sistema Estatal de Saúde.
Desde a central nacionalista entenden que os hospitais e estabelecementos sanitarios da sanidade privada da Galiza están incluídos na normativa anteriormente relacionada, polo que considera que todo o persoal destes centros debera estar a disposición do sistema sanitario publico para cubrir as necesidades asistenciais da presenza da Covid-19 no noso país.