O ex presidente da Xunta e ex ministro do franquismo, Manuel Fraga, conta con distincións e títulos en Ferrol como os de “Fillo adoptivo”, que foi outorgado en plena ditadura e represión, en marzo de 1965.
O BNG quere acabar cos honores outorgados a Fraga durante o franquismo. De aí que anunciase unha moción para o próximo pleno na que insta a Corporación municipal a retirarlle todos os títulos.
O portavoz nacionalista en Ferrol, Iván Rivas, lembra ao respecto que a Lei da Memoria Histórica, no seu artigo nº15, estabelece que as administracións públicas, dentro do exercicio das súas competencias, tomarán as medidas oportunas para a retirada de escudos, insignias, placas e outros obxectos ou mencións conmemorativas de exaltación, persoal ou colectiva, da sublevación militar, da guerra civil e da represión da ditadura.
En Ferrol aínda persisten pegadas que lembran a ditadura franquista e privilexios como a propiedade da tumba de Catabois que, pese a mocións aprobadas en pleno, continúan sen ser eliminados.
“É hora de librarnos completamente dos retazos que o franquismo e o seu réxime aínda manteñen na nosa cidade, de rematar cos silencios cómplices, e pola dignidade de deixar de loar por omisión unha ditadura fascista que provocou milleiros de mortos froito da represión cruenta que practicou”, apunta o portavoz nacionalista nun comunicado de imprensa.