O Ministerio de Defensa recuperou esta mañá as instalacións da Fábrica de Armas da Coruña após de varios anos de incumprimentos por parte da concesionaria, Hércules de Armamento, e de varios requirimentos á empresa para que deixara a factoría, da que nunca chegou a saír ningún arma.
A Delegación do Goberno español na Galiza deu conta do desaloxo a través da súa conta de Twitter, na que aseguraba que, con esta actuación, o Executivo daba cumprimento ao seu "compromiso" coa cidade da Coruña. Tamén apuntaba que Hércules de Armamento, a empresa que se fixera coa concesión hai seis anos, após da marcha da multinacional General Dynamics, accedera a abandonar as instalacións "de forma voluntaria".
El Gobierno de España cumple su compromiso con A #Coruña y hoy a las 9 horas se ha desalojado la Fábrica de Armas, de forma voluntaria. @Defensagob ha recuperado la instalación, paso previo para su cesión a la @UDC_gal, para desarrollar el proyecto de las TIC.
— Delegación del Gobierno en Galicia (@DelGobGalicia) February 11, 2020![Publicidade 195634]()
Coas naves da factoría liberadas, o Ministerio de Defensa xa ten vía libre para facer efectivo o acordo de cesión acadado coa Universidade da Coruña (UDC) para a creación da Cidade das TIC, un proxecto que ten como obxectivo crear un polo tecnolóxico de referencia na Galiza. A UDC conta para iso co apoio de varias empresas con importante peso no sector e do Cluster TIC, entre as que se atopan R, Cinfo, Éveris ou Indra. O investimento estimado para a adecuación dos espazos, que suman 90.000 metros cadrados, aproxímase aos 22 millóns de euros.
Terreos para o novo hospital
Esta superficie é solo unha pequena parte dos terreos dos que dispón o Ministerio de Defensa na zona de Pedralonga. De feito, nos últimos meses, a parcela da antiga Fábrica de Armas barallouse como posíbel alternativa para construír alí o novo hospital da Coruña, pero finalmente a Xunta optou por levantalo no mesmo emprazamento que o actual, en parte para non interferir co proxecto da Cidade das TIC.
