O coronavirus tería entrado no Estado español a mediados de febreiro

O coronavirus entrou no Estado español entre o 14 e o 18 de febreiro a través de múltiples lugares, segundo determina un novo estudo realizado no Instituto Carlos III de Madrid.  
O coronavirus tería entrado no Estado español a mediados de febreiro (Imaxe: Iñaki Berasaluce / Europa Press)
photo_camera O coronavirus tería entrado no Estado español a mediados de febreiro (Imaxe: Iñaki Berasaluce / Europa Press)

Científicas conclúen nun novo estudo realizado no Instituto de Saúde Carlos III, en Madrid, que o coronavirus entrou no Estado español entre o 14 e o 18 de febreiro a través de múltiples lugares.

O estudo do xenoma completo do SARS-CoV-2, o virus que causa a enfermidada COVID-19, identificou tres grandes familias do virus que se estenden por todo o mundo: G, V e S.

As investigadoras obtiveron un total de 28 secuencias de xenoma completo, a partir de 14 mostras procedentes de Madrid, Valencia, Castela e León, Castela A Mancha, Andalucía, Euskadi e a Galiza. 

As análises revelaron que 26 secuencias están distribuídas nas familias G e S e dúas na V. A maioría das que pertencen á S sinalan que están relacionadas cun caso do día 1 de febreiro na cidade chinesa de Xangai e que o virus desa familia S se atoparía en España sobre o 14 de febreiro. En canto á G, que xurdiu en Europa dun caso de infección na Alemaña, estiman que estaba en Madrid sobre o 18 de febreiro. As científicas non puideron determinar a orixe da familia V en España.

Rastreo nas comunidades

O director do Centro de Coordinación de Alertas e Emerxencias Sanitarias do Estado español, Fernando Simón, sinalou que, antes de iniciar o desconfinamento débese  garantir que todas as Comunidades Autónomas teñan capacidade para detectar, isolar e rastrexar todos os casos e os seus  contaxios. Segundo o experto, esta situación poderíase cumprir en "ao redor de dúas semanas".

Para a desescalada Simón sinalou que a taxa de reprodución do virus, é dicir, o número de persoas que un infectado poida contaxiar, sexa inferior a un. Segundo os datos de 22 de abril o Estado está en 1 e a Galiza en 1,02. 

Comentarios