En Galiza operan desde hai catro décadas dúas térmicas de carbón. A das Pontes é propiedade de Endesa. Naturgy (antes Gas Natural Fenosa) é propietaria da central de Meirama (Cerceda). “Ambas as dúas provocaron 143 mortes prematuras durante 2016, foron responsables de 5.000 casos de síntomas de asma en nenos e nenas, de 106 novos casos de bronquite crónica e de 117 ingresos hospitalarios por problemas respiratorios e cardiovasculares. Os custos sanitarios por causa dos ingresos hospitalarios e máis da perda de 52.000 días de traballo estimáronse en até 430 millóns de euros”. Son dados que ofrece a plataforma ‘Galiza, un futuro sen carbón’, recentemente constituída por varias entidades e organizacións.
A plataforma Europe Beyond Coal, da que forma parte Galiza, un futuro sen carbón, lanzou a semana pasada o informe ‘Último alento: As compañías do carbón que están enfermando Europa’. O documento incide no custo oculto do uso de carbón para a produción de electricidade, utilizando modelos de datos que teñen en conta as emisións das centrais e a meteoroloxía para estudar os seus impactos na calidade do aire e a saúde da poboación.
Os resultados, aponta a plataforma, indican a responsabilidade que teñen compañías de enerxía europeas que utilizan carbón para xerar electricidade. As emisións de gases tóxicos e partículas procedentes das súas centrais provocan “graves problemas de saúde” e até 22.000 millóns de euros en custos ocultos. “As máis de 250 centrais de carbón que operan actualmente en Europa son responsables de 7.600 muertes prematuras anuais”.
A plataforma ‘Galiza, un futuro sen carbón’ está impulsada por organización, colectivos e de cooperativas verdes: ADEGA, Amigos da Terra, Asociación Naturalista Baixo Miño (ANABAM), Asociación pola Defensa da Ría (APDR), Ecoar Global, Ecoloxistas en Acción, Feitoría Verde, Ghichas Co-mando, Greenpeace, Nosa Enerxía, Petón do Lobo, Plataforma contra a Mina de Touro-O Pino, Verdegaia.